In hmun neite tan property card sem
Survey of Villages and Mapping with Improvised Technology in Village Areas (SVAMITVA) Scheme kaltlangin Prime minister Narendra Modi chuan Inrinni khan India rama state 10 leh union territory 2-a in hmun neitu nuai 65 chuang hnenah property card a sem chhuak a. Card sem zingah hian Mizorama khua 18 atanga property card 1754 pawh telin, he hun hi larsap Gen (Dr) VK Singh (Retd) chuan Raj Bhavan atangin inbiakhmuh theihna kaltlangin a telpui.
Larsap chuan Mizoram chu hmarchhak huamchhung atanga property card dawng hmasa ber a ni chu chhuanawm a tih thu sawiin, Land Revenue & Settlement hotute chu SVAMITVA scheme hnuaia hmalakna a hlawhtlin theihnan tan la turin a chah.
SVAMITVA scheme hi 2020 April 24 khan Prime minister-in a hawng a, in hmun neitute tana revenue document felfai tak, drone survey leh GIS technology hmanga chhinchhiah thlapna a ni. Bank loan lakna atana dahkham bakah pawimawh dangah pawh hman theih a ni.
Hemi kalpui tur hian Mizoram sawrkar leh Survey of India chuan 2021 July 8 khan thawhdunna thuthlung an ziak a. Revenue survey la tih loh na khuaah 2021 December 9 atang khan drone survey tanin, 2024 December 2 khan zawhfel a ni. District 9-a khua 319 ah drone survey hi neih a ni.
Mizoram chu hmarchhak huamchhungah property card sem chhuak hmasa ber niin, 2023 April 24 khan property card sem chhuah tan a ni a, vawiina sem chhuah nen hian tunah Mizoramah card 2909 sem tawh a ni. Ruahman dan chuan he hmalakna kaltlang hain Mizoramah property card 35000 vel pek chhuah tum a ni.
Larsap hi Land Revenue & Settlement minister B Lalchhanzova, secretary Vanlalmawia leh hotu dangten an tawiawm a ni.
In hmun neite tan property card sem
