In in-ah khan cancer siamtu
i kawl reng lo maw?
Chemical kan hman tlanglawn tak- rannung thah hlo leh plastic lam thil leh kan damdawi ei thin thenkhat te hian cancer an thlen thei tlat. Tlem tham deuh pawhin cancer a siam thei tlat niin mithiam ten an sawi. Ram hrang hrang 28 (India pawh telin) a mithiam rual 174 ten zirchianna an neih atanga an thutlukna hi hriat ngei a pawimawh. An zirchianna atanga an hmuh danin heng chemical hrang hrang kan kawl te hi a mal chauh ni lova chemical dang nena an awm ho hian cancer siam turin an thawk chak zawk lehnghal niin an sawi.
Times of India health section-in a tarlan danin tun tum hi hetianga kan chemical hman tlanglawn deuh ten cancer an thlen theih dan zirchianna an neih tum khatna a ni a, mithiam te hian chemical chi hrang 85 an zirchian zinga 50 te chuan cancer thlen turin low dose effect an tih mai ‘hallmarks of cancer’ an nei a, a dang 13 chu hlauhawm lehzual, cancer thlen awlsam tak tih an hmuchhuak a, a dang 22 erawhin cancer an thlen theihna an hmu lo thung.
Chemical kan hman tlanglawn deuh zinga cancer thlen thei an tih zingah chuan insecticides, fungicides, pesticides, additives to plastic (plastic siam nana hman), PVC leh polycarbonate plastic atanga siam ei tur dahna (container) leh tui bottle kan tih ang chi te, handwash leh cosmetic-a an telh biocides bakah damdawi thenkhat phenobarbital leh acetaminophen te, rawng (paints) a meialh (flame) laka vengtu an hmang ang chi te leh in sakna bungraw hrang bakah carpet leh thil danga rawng bet tura vengtu (stain repellant) te chu a langsar zual deuh an ni.
Brunel University, London-a professor leh he zirchiannaa an hotu pakhat Hemad Yasaei chuan, “Hei hi chemical cance thlen thei laka kan him theih nana kan tih a ni. Henga kan tarlan te hian cancer an thlen ngei ngei kan ti lo va, mahse, cancer thlen thei an ni kan ti mai a ni,” a ti.
Plastic-a an hman thin BPA/triclosan leh toothpaste-a an hman thin te hi mihring hriselna atan a tha lo tih chu hriat a ni tawh a, tunah cancer thlen thei a ni tih an hrechhuak leh ta a ni.
In in-ah khan cancer siamtu i kawl reng lo maw?
