Congress leader Rahul Gandhi chu Lok Sabha MP a nihna atangin disqualified a ni a, hei hi criminal defamation case-ah thiamloh chantira kum hnih lung in tang tura Court-in a chungthu a rel tak vang a ni.
Defamation case hi kum 2019 ami daih tawh kha a ni a, Rahula’n, ‘enga tinge rukrute hian Modi hming an put vek’ a tih avanga defamation case theh luhah thiam loh chantir niin kum hnih lung in tang tura tih a ni a. Representation of the People (RP) Act, 1951 chuan, Member of Parliament chu ‘thiam loh chantir a niha kum hnih aia tam lung in tang tura tih a nih chuan disqualify theih’ a tih tlawhchhana thutlukna hi siam niin a lang.
Mizoramah pawh tunhma atang tawhin politics huang chhungah hian politician-ten inbeih nan tawngkam dengkhawng leh tuitang lo tak tak an hmang thin a, thubuai hlabuaia lak tak tak a awm meuh thin lo a; hei hi a chhan ni thei chu, anmahni pawhin khatiang tawngkam dengkhawng leh tuitang lo kha beihlet nan an la hman ve duh dawn vang te pawh a ni thei ang. Chubakah chuan, politics-a inbeihnaah chuan engkim hi thiang vek anga ngaih a nih vangte pawh a ni thei awm e.
Tuna social media a lo chak tak em em hnuah phei hi chuan, politics huang chhungah chauh pawh ni lo, eng hun leh khawi hmunah pawh, mipui lam atanga hetiang tawngkam dengkhawng leh tuitang lo tak tak hian kan khawvel hi a tuam hlup hlup tawh a ni ber a. TV lama fakselna leh, social media platform hrang hranga kan tawngkam chhakchhuah thenkhatte hi chu ‘thubuaia lak tham’ ni awm tak tak a tam ta hle. Assembly Session laia Live Chat te phei chu, serh leh sang awm lova comment pekna a chang zo tawh. Ram hruaitute kan demna tawngkam tam tak hi chu defamation case file-na tham a ni deuh fur tawh awm e.
Hei hi ngun taka ngaihtuah a ngai tawh a; YMA leh kohhran atanga tanlakna tur chi niin a lang. Chuti a nih loh chuan, hnam nunphung culture pangngaiah kan seng lut mai ang tih hlauhawm tak a ni tawh.
Inbeihna tawngkam
![](https://theaizawlpost.org/wp-content/uploads/tap_logo-min-large.jpg)