Inbiak hma lawka Russia-in Ukraine a kahnaah pahnih thi

Russia-in drone hmanga Ukraine-a Zaporizhzhia khawpuia in pakhat a fuhah mi pahnih an thi niin tual chhung thuneituten an sawi.
US-a Ukraine leh American inbiak leh hma chiaha pawikhawihna thlengah hian naupang pahnih, kum 11 leh 15 te pawhin hliam an tuar.
Iran-a buaina a chhuah atangin Ukraine-a indona tihtawp tura inbiakna hi chhunzawm a ni tawh rih lo va. President Volodymy Zelensky-a chuan palaite chu US-in Russia tuialhthei hrekna tihziaawmna tura thutlukna siam chungchang sawipui turin a duh a. Washington hian khawvel puma energy man tihhniam a nih theih nan hrekna tihziaawm hi a kalpui a ni.
Inbiak tan niah Ukrainian palaite chuan Donald Trump-a palai, Steve Witkoff leh president makpa, Jared Kushner te an kawm.
Pathianni khan an inbiak chhunzawm a. Zelensky-a chuan Inrinni zan khan, “Khawvel puma kan zavaia tan indawr chhunzawm zel a pawimawh a, he indona hi tihtawp kan tum a ni,” a ti.
“A pawimawh ber chu Russia hian indona tihtawp tak tak tura hma a lak dan leh hei hi rinawm tak leh zahawm taka ti tura an inpeih dan hriat a ni a. Hei hi Iran dinhmun avang hian ram hrang hrangte inkara boruak a zual zel tih ngaihtuah chuan a pawimawh hle a ni,” a ti.
US hmalaknaa inbiakna hian tun thlengin Ukraine-a indona a titawp thei lo va, Russia-in a thil phut a thlak thei lo va, hmasawnna tur a awm beiseina pawh a tam lo hle.
US inbiaknaa sawiho tur zingah Russia tela ram pathum inbiakna dang siam chungchang a tel a, hei bakah hian Zelensky-a leh Trump-te inkar ngaihdan inang lo chin fel tuma hmalak pawh a tel a. A hmain American hruaitu hian Ukrainian hruaitu hi remna daltu ber niin a lo puh tawh a ni.
Ukraine hian US hnenah drone thiamna leh technology pek a tiam a, hei hi Iran nena an inbeihnaah ral beih nan leh invennaah a tangkai theia ngaih a ni.
Kum 2022-a Ukraine an beih tan atang khan Russian sipaite hian Zaporizhzhia hi an bei fo tawh thin.
Zaporizhzhia hi Russia-in Ukraine khawchhak lam region pali a lak zinga pakhat a ni a, heng zinga pakhat mah a thunun vek erawh a nei lo.
Kar hmasa khan BBC-in an kawmnaah Zelensky-a chuan Middle East-a indona avangin Ukraine-in missile tlakchhamna a tawk tih a sawi a, ‘hei hi US leh Israel-in Iran an beih vang’ a ti.
Ukrainian president chuan Russia President Vladimir Putin-a’n US, Israel leh Iran inkara indona rei tak awm a duh thu a sawi a, hei hian Kyiv a tihchak loh phah dawn a, US sumte chu hmun danga hman a ngaih phah dawn vang niin a sawi.
Trump-a sorkar chuan thla tir lama Russian tuialhthei leitu ramte hrekna tihziaawm a tum chu Kremlin-in a lawm laiin Ukrainian-te tan erawh ngaihtuahna sen ngaihna a ni thung.
US-in thla khat a ngaihhnathiam avangin ram hrang hrangin Russian tuialhthei hi an lei awlsam phah dawn a. Chu chu an tan Ukraine an beih mekah sum an neih theih phahna tur a ni thei dawn a ni.