Inbiak mek laiin Afghanistan leh Pakistan inkap leh
Thla hmasaa nasa taka ramria an inkah hnua inkahhai siam tura an palaite Turkiye-a an inbiak mek laiin Pakistan leh Afghanistan chu ramriah an inkap leh.
Ningani khan Istanbul-a ram pahnih aiawhte hi October 19-a Qatar-a an lo pawm tawh, Asia chhim lam ram inthenawmte inbeihna chhuak titawp tura inrintawnna an lo ziah tawh a taka kalpui zel turin an indawr a. An indonaah hian sipai leh civil mi telin mi tam tak an thi a, za tel hliam tuar an awm bawk.
Ramri boruak hi a tang hle a, Islamabad chuan an rama pawi khawih thin, Pakistan Taliban (TTP) chu Kabul-in a khawi niin an puh a. Afghanistan-a Taliban sorkar chuan a pha thung.
“A thawh thum nana Istanbul-a Pakistani lam nen inbiakna neih a nih mek laiin vanduai thlak takin chawhnu khan Pakistani sipaiten Spin Boldak-ah silai an hmet puak leh a, mipui pawh an mangang hle a ni,” tiin Afghan sorkar thupuangtu, Zabihullah Mujahid chuan Ningani khan a sawi.
Spin Boldak hi Afghan chhim lam, Kandahar province-a awm a ni.
“Islamic Emirate sipaite chuan civil mite tawrhna tur an veng a, engtin mah an chhang let lo,” tiin Mujahid-a chuan X-ah a tar lang.
Pakistan chuan Afghanistan puhna phain a che hmasaah a puh let a. “Afghan lamin Chaman-a Pak-Afghan ramria thil thleng an sawi dan hi a dik lo,” tiin Pakistani information & broadcasting ministry chuan X-ah a tar lang.
“Afghan lam atangin silai a puak a, kan lam atang pawhin inven nan leh a chhan let nan hmet puah ve a ni,” a ti.
Taliban sorkara hotu, Hamdullah Fitrat chuan Pakistani-ten silai an hmeh puah chhan hi ‘an hre lo’ tih AFP news agency a hrilh a. Kandahar-a information hotu, Ali Mohammed Haqmal-a chuan silai puah chhung a rei lo niin a sawi a, mi chengte pawhin minute 10-15 vel a nih thu AFP an hrilh bawk.
Pakistan pawhin boruak tha lo a awm zui lo tih a sawi.
Istanbul-a inbiaknaah hian inkahhai kalpui dan tur kimchang duan a ni a, lehlam lehlam hian thil kalpui tha tawk lo niin an inpuh ve ve a. An inrem loh chuan thil tha lo tak chhuak theih niin an sawi bawk.
Inkahhai hi kalpui mek ni mah se Pakistan leh Afghanistan inkalpawhna leh sumdawnna a tawp ek rih a. Ramri hi October 12 khan khar a ni a, Pakistan chuan Afghan raltlante an haw theih nan pahnih erawh an hawng zauh zauh.
UN-in a sawi dan chuan October 9 atanga an inbeihnaah khan Afghanistan lamah civil mi 50 thiin hliam 447 an awm a. Kabul-a bomb puakah mi panga an thi bawk a, Taliban sorkar chuan Pakistan tihah a puh.
Pakistani sipaite chuan sipai 23 an thi a, 29 an inhliam tih an sawi a, civil mi thi an sawi lo.
Inbiak mek laiin Afghanistan leh Pakistan inkap leh
