Power & Electricity department chuan Mizoram khaw hrang hranga VC te hnenah an ram chhunga Solar Plant hmun tur dilna lehkha an thawn chhuak a, hei hi Environment and Social Justice (CESJ) chuan hnukkir turin an ngen a.
Lehkha hnukkir tura an ngen chhan point hrang hrang an tarlang a, chungte chu: solar power te hi chhun lamah chauh hman theih a nih avangin zan lama phai power kan lak a ngai reng tho a. Solar Power Plant siam belh hian awmzia a nei tam tawh lo; Public-Private Partnership (PPP) mode-a Electric siam chhuah a, sawrkarin a lei let leh tura inremna siam ang chi hi a man a sang; PPP mode-a Solar siam chhuah a nih hian a lei letnaah sawrkar a insen viau tho a ngai a, ram leilung nasa taka a tihchhiat bakah lo leh huana neih tlak / theih loa a siam nen a inhen lo; PPP mode-a PPA sign-naah chuan vai company lian leh Mizo tute emaw an inthurual a, kan ram leilunga electric an siam chhuah kha sawrkarah an hralh leh thin a, mimal hausakna siamsakna chauh a ni, tihte a ni.
CESJ tanchhante hi ngun taka zirchian a, a tha lo lai siam that tum hi thil pawimawh tak a ni awm e.
Mihring pung zel leh eizawnna thar lo chhuak zel avangin Power mamawhna hi chu a sang telh telh tur a ni a, chumi phuhru tur chuan kawng hrang hranga hmalak a ngai a, chu chu khawvel awm chhunga kan buaipui tur a ni. Hetih rual hian, power kan mamawhna zawn ringawt thlira thildang hlamchhiah chunga hma lak chiam mai hi thil awm thei a ni a, thil reng reng chu a inbuk tawka kalpui a ngai a ni.
Power mamawhna phuhru tur emaw, power intodelha hnianghnar tur leh hralh chhuah tham hial pawh siam chhuak tur hian tuikhuah tam tak siam theihna kan nei tha viau pawh a ni thei; mahse, power hnianghnar tak siin kan environment kan tichhe vek thei a, a lehlamah tawrhna hrang hrang a lo chhuak thei tih hriatchiansa a ni a, chumi vengthawng ran chunga hmasawnna hi kan zuan a pawimawh a ni.
Hmasawnna duh luatah kan environment hi kan tichhe vek thei a, environment chhia siam tha leh tur hian kum za tel a ngai thin a ni.
Inbuktawk a ngai…
![](https://theaizawlpost.org/wp-content/uploads/tap_logo-min-large.jpg)