Incentive cash award dawn theih dan hriatchian a ngai

Incentive cash award dawn
theih dan hriatchian a ngai
Incentive cash award inpek chungchangah hriatchian loh a awm thin a, competition azira inpek niin, sports discipline azir a ni lo tih Sports minister hlui Robert Romawia Royte chuan a sawi.
MLA Robert Romawia sawi danin, sports thei bikte puala chanvo ‘Incentive cash award rules 2001’ chu sports thei bikte duhsakna avangin ‘Mizoram sports incentive cash award scheme 2022’ a thlak a ni a. 2001 rules leh 2022 scheme hi Mizo infiammite leh sawrkara sports enkawltuten an hrechiang lo tih a sawi. Kum 2022-a Mizoram sports incentive cash award scheme chu tun thlenga hman mek niin, rules 2001/scheme 2022 ah hian incentive cash awards dawng thei tur bik sport discipline an awm chuang lo tih a sawi.
“Incentive cash award hi competition base-a siam a ni a, sports discipline base-a siam a ni lo,” a ti.
Eng sport discipline pawh nise, heng – Mizoram State Games, Northeast Games, Northeast Festival/ Competition, All India Rural Sports, All India Women Sports Festival, All India Inter-university Tournament /Championship, Khelo India Youth Games/ National Youth Games, National Championships/ Games, Para National Championships /Games ang chia medal dawng chuan Mizoram Sports Incentive Cash Award Scheme 2022 angin sumfai lawmpuina an dawng tur a ni tih ziahlan a ni a. 2001 Rules leh 2022 Scheme-ah hian national championships bika incentive cash award dawng thei tura tih chu Indian Olympic Association hnuaia sports federation inziaklutte huaihawt leh hriatpui competition/ tournament-a medal la an ni tur tih a ni tih a sawi.
Eng sports discipline tan pawh heng international competitions – Olympic qualifying tournament, Asian Championships, Asian Games/ Commonwealth Games /Para Commonwealth Games/ Asian Games, World Cup, World Championships /Para World Championships (kum 4 dana neih ho), Youth Olympic, Olympic Games /Para Olympic Games-a medal la chin chuan incentive hi an la thei a. Heng tarlan zingah hian Olympic qualifying tournament tih loh zawng chu medal la pha kher lo pawh, an tel hrim hrim a nih chuan Mizoram Sports Incentive Cash Award Scheme 2022 angin sumfai lawmpuina an dawng thei vek tih a sawi bawk.
Hei hian infiammite chauh nilo, anmahni hruaitu coaching staff leh official-te pawh a huam vek a, an kaihhruai infiammite sum dawn zat atanga zaa 25 an dawng ve thei tih Robert Romawia Royte hian sawiin, sawrkar hnathawk an nih phei chuan an hlawhah increment dawngin, an service-ah hamthatna tam tak an dawng thei tih a sawi a ni.