Incentive cash award semchhuak

Incentive cash award semchhuak
Thawhlehni zan khan Direc-torate of Sports & Youth Services Department buatsaih ‘Incentive Cash Award 2020-2021’ semna inkhawm chu Vanapa Hall-ah buatsaih niin, khuallian atana hman sports minister Robert Romawia Royte chuan infiammi thei falte hnena sumfaia tanpuina leh lawmpuina tangka dahhran chu a semchhuak.
Incentive Cash Award 2020-2021-hi infiamna discipline hrang hrang 11 – taekwondo, muaythai, shooting, arm wrestling, table tennis, boxing, motorsport, se-paktakrow, kick boxing, weight-lifting leh football-a medal la pha infiammi 109 leh official mi 14, an vaiin mi123 hnenah sem a ni.
He’ng discipline-a medal lak zat hi 199 a ni a; tun tuma incentive cash award semchhuah zat hi a vaiin Rs. 44,88,150 niin, kum 2020-2021 chhunga medal dawngtute hnenah Rs. 22,88,150 leh kum 2022-a buatsaih Khelo India Youth Games 2021-a tel medal dawngtute hnenah Rs. 22,00,000 pek a ni.
Khuallian chuan Covid-19 hrileng avangin punkhawm a harsa hle a, Incentive Cash Award pawh duh anga hmaa sem a harsat thu a sawi a; khawvelin infiammite a ngaihhlut thu tarlang telin, Mizoramah pawh infiammite ngaihhlut a tul takzet tawh tih a sawi.
Minister chuan award sem tak chu medal la nazawngte dawn theih a ni loh thu leh Incentive Cash Award Scheme hnuaia thlanchhuahte chauh dawn mi a nih thu sawiin, Mizoram sawrkarin infiammite hamthatna tur kawng hrang hrang a ngaihtuah thu leh Incentive Cash Award Rules 2001 siamthat a nih thu te, kum 2022 khan Incentive Cash Award Scheme tih a lo nih tak dan leh he scheme thar hnuaiah hian infiammite’n medal an lak dan azir leh a enkawltu leh inelna neihna hmuna hruaitu official-te sum leh pai pek dan tur felfai taka duanchhuah a nih tak thu a sawilang tel.
He scheme-in a tum ber tarlangin, infiammite tihphur leh sang zawk an thlen theihna’n te, anmahni inenkawlna leh mamawh leina tura sawrkarin tanpuina a pek liau liau a nih thu tarlangin, infiammite chu nasa zawka tan a laktir ngei a beisei tih a sawi bawk.
Romawia chuan Mizoramin medal tam zawk a lak theihna’n medal tamna sports uar zawka kalpui a ngai nia a hriat thu sawiin, a bik takin athletics, swimming leh archery-te chu Mizo thalai tam zawkte’n luhchilh se a duh thu a sawi.
Minister chuan Mizoram sawrkarin infiamna a ngaih-pawimawh thu tarlang telin, sports chu industry-ah a puang hial tih a sawi a; sports ruhrel hmasawnna turin theihtawp chhuah a ni a, sports zirna tur (sport school) pawh Mizoram hmun nga laiah siam mek a nih thu sawiin, reilotea hawn thuai a nih tur thu a sawi.
Sawkarin infiamna tur hmun-hma a siamte leh infiammite tihphurna tur Incentive Cash Award-a sem thinte chuan tha-laiteah chona thar thlen ngei se a duh thu sawiin, Mizoram bakah India tana mi chhuanawm ni tura tan la thar turin a chah bawk.
Robert Romawia Royte chuan infiamna chu hriselna atana thil tangkai a nih thu a sawi a, mipui tam zawkin hriselna tha an neih theihna’n infiamna engemaw tal ti thin turin Mizo mipuite a chah a; ram hmasawnna turin hnathawh a ngai a, hnathawk turin hrisel a ngai bawk a, hlim tak leh phur taka hnathawk thei turin infiamna pawh mipuite’n uar thar se a duh thu a sawilang tel bawk.
Romawia Royte chuan Incen-tive Cash Award Scheme 2022 hmang hian Commonwealth Games 2022-a gold medal latu Jeremy Lalrinnunga leh hockey-a bronze medal latu Lalremsiamite hnenah pawisa fai hlan a lo nih tawh thu tarlangin, sports minister a nih lai ngeia Mizoram mai ni lo India ramin hetiang hlawhthilnna a chang chu vannei a intih thu a sawi a, an kal leh zelna turah duhsakna a hlan nghal a; Mizote hian national leh international level-ah pawh medal tam zawk dawng thei turin theihna lian tak kan nei tih inhriaa nasa leh uar zawka tan la thar turin kalkhawmte leh Mizo thalaite a sawm nghal bawk a ni.
Khualzahawm T.C. Pa-chhunga, vice chairman, Sports & Tourism Development Board-pawhin thu sawiin, infiamna lama hmasawnna tura theihthawp chhuah thin sports minister a fak a, award sem inkhawm chuan thalaite zingah chona thar a pek ngei a beisei thu tarlangin, ruhhlo laka fihlim turin mahni inthunun theihna ngaipawimawh thar turin kalkhawmte a chah bawk.
Incentive Cash Award semna inkhawmah hian Sports & Youth Services Department Director Lalnunhlua chuan kalkhawmte lawmna sawiin, report a pe a; Mizoram State Sports Council Secretary John |anpuia’n lawm-thu a sawi ve thung.