JC.Zoremi Hmar Joute
Mifing, chhungkaw fing leh hnam fing tehna awlsam tak chu a hun leh hmun azira inchei thiamte hi an ni. Kan thawmhnaw inbel chu label leh brand tha leh to pawh ni se, a inbeltuin a hun leh a hmun a thlan thiam loh miau chuan changkang takin a mualpho hlauh thei!
A bikin hmeichhiate ten kan zir tur pawimawh tak chu hnam dang zinga hâk àwm thlan chungchangah a ni. Entir nan kekawr bul chhing tak hi tunlai fashion a nih miau chuan do ngawt theih a ni lo. Mahse khawi hmunah nge tih leh tu bulah nge hâk tur tih hriat a ngai. Mi culture leh sakhaw puithuna palzutsak hi a ram neitu tan na tak a ni, Muslim kulmuk tan chuan taksa tam tak lang chunga khawlaia hmeichhia an kal hi, Kristian tana Kraws chil chhâk khum a nat tluk zeta an rilru tinatu a ni thei; Runluih chu mawlna pawh a ni satliah lo, nunna hialin a tawrh phah thei a ni.
Kristian nunphung lansarh zawkna ramah chuan hmeichhe tan kekawrbul chhing hâk hi a sual lem lo. US leh Europe-ah te pawh a pawi hauh lo. Tin, Kristian bakah Buddhist pawh hi an inhawng zau sâwt hle. Khawchhak ramah pawh a khawpui lai, Singapore. Bangkok, Taiwan. Hongkong, Macau, Seoul leh Japan khawpuia i kal chuan kekawrbul chhing mangkheng pawh hà la a pawi lo. Khaw lum lai chuan, a khawtual mi tam tak inchei dan a ni ve tho a, an zinga mi pakhat anga lan ve mai hi a pawi lem lo; Muslim leh Hindu tam zawkna ramah chuan khawtual incheina nena inpersan deuha inchei erawh a hrisel vak lo thung ang.
India rama khawpui lian, Mumbai, N Delhi, Kolkata leh Bangalore velah chuan taksa lang tam taka inchei hmuh tur an awm ve zeuh zeuh a, hetianga inchei India hmeichhia chu duh duh huna London, Paris leh New York-a kal thei, chhungkaw thla khat sum lak luh Rs Nuai 5 aia tlem lo, Picasso leh Michael Angelo kut chhuak hre hrang, Car Nuai 10 man hnuai lama chuan zah nachang hre deuh vek an ni. Chutiang, tualchhung mi, class sang tak an nih loh vek chuan keinin KS kan tih bul hnaia mite anga ngaih an ni; chutiang mi an nih loh vêk chuan ram pawn atanga khualzin anga ngaih an ni.
Vâi mipa rilru hi a chhe hran lo. Bollywood film-ah hian India ram pawn behchhana lem chan tam tak an hmuh tawh avangin tun hma angin an ngaihtuahna pawh a zim tawh lo va, thil an hrethiamin an thliar hrang thiam ve hle tawh a. Khawpui Taxi driver te phei hi chuan tawng ri leh awphawi atang hian Korean, Japanese leh Chinese te hi an thliar hrang ve zung zung thei tawh a ni.
Mizo nulain India khawpui khawlaia kekawrbul chhing tak i hak chuan khawchhak khualzin angah an ngai tlangpui ang che a, Buddhist ni turah an ngai tlangpui bawk ang che. A nih loh vêk chuan sawi tak ang khan khawtual mihausa tak fanuah an ngai dawn che a ni. Mahse i sahdah hmuam te, i kuhva ei te an hmuh tel a, banga chinai i tah te an hmuh che a, dawr liana credit card phawrh tura an beisei lai chea a cash-a i phawrh a, i chhiar mual mual a, i hawihera an beisei ang ‘class’ an hmuh si loh chuan leh, driver khalhsak Car changkang nei tura an ngaih lai chea Auto Rickshaw i phar luap luap bawk si chuan ‘a bam vek Lalngo’ tih ang vel a ni dawn a ni.
Mi tu pawh, kan inhmuh tirh aia kan inthen dawna an ngaihsanawmna kan hriat belh hian a tha zawngin kan hre reng thin. Chutiang bawkin inhmuh tirh aia inthen dawna an lo nepzia kan hmuh chhuah hlauh chuan a chhe zawngin kan hre reng tawh thin bawk. I thawmhnaw hak avang ringawt khan vai mipa rilruah hmuhsitawma hriat reng emaw, ngaihsanawma hriat reng i ni tawh dawn a ni tihna a ni. I inchei dan vang khan nang chauh ni lo, i Mizopui hmeichhiate dinhmun zahthlak takah i dintir thei a, hnam hmeichhe zahawmna tibawrhbangtu i lo ni hlauh dah ang e! ‘Inchei loh tur’ tihna lam ni lovin, a hun leh hmun hriat tur kan ti a nih hi.
Mizo hmeichhia, dawhsana mipui hmaa ding tur reng reng chuan a theih chuan puan bih se a mawi ber mai. Puan bih ngei ngei tur tia innawrna lam ni lovin, formal thei se tihna lam zawk a ni e. Mizo nu tak maia inchei, puan bih hnáp mai thu sawi chu ngaihthlak pawh a chakawm bik a, an sawi hma hauhin an inchei dan khan mipui a hip thin a ni; an hmuhnawm a, an zahawm a, an chhuanawm thin a ni.
Mipui hmaa chawimawina thil eng pawh kan hlan hian, a thil azirin a hlantu leh a dawngtu hian a inhmeh zawnga inchei dan thiam thin se a duhawm ngawt bawk mai. School naupang hnena School Certificate hlan a nihin zirlai chuan school uniform ha ngei se, uniform hrim hrim hi a zahawmin a mawi a, a hlantu pawh zahawm takin inchei se a tha. Zahawm han tih hiankhawthlang ram anga uluk leh hautak lam ni lovin kan incheina formal pangngai ang hi ni mai se ka tihna a ni e.