Independence Day-ah Zo hnahthlakte’n hun hmang

August ni 15 kha India ram Independence Day a ni a,
Lamka khawpuiah pawh Zo hnahthlakte’n hemi ni hian hun an hmang.
Meitei nena inbei mek Zo hnahthlakte’n ram leh hnam tana inpekna lam hawiin hun an hmang a, Zo hnahthlakte ram veng tura inpete’n rinawmna thu an tiam.
Zomi Council Steering Committee huaihawtin Lamka Public Ground-ah hun an hmang a, Meitei nena an intihbuainaa nunna chan Zo hnahthlakte zahna chibai an buk. Zo hnahthlak pawl hrang hrang aiawhte’n thu an sawi a, Zo hnahthlak hrang hrangte’n mahni hnam thuama inthuamin ‘march past’ an nei bawk.
He hunah hian tun tum buainaa nunna chan hmasa ber Pastor Sehkhohao nupui Nengzahoi-i’n flag a pawt pharh a, chumi zawhah Zo hnahthlak chi peng hrang hrangte’n mahni chi peng thuam inbelin march past an nei nei a ni.
Pastor Sehkhohao hi Kangvai khuaa cheng a ni a, an buai tan ni May ni 3-a nunna chan a ni. Churachandpur district-a Zo hnahthlak pawl hrang hrang telna Indegenous Tribal Leaders Forum (ITLF) hruaitute chuan Zo hnahthlak lamah Manipur pumah tun tum buainaa nunna chan mi 130 chuangte hming hriat a nih tawh thu an sawi a, Lamka Public Ground-a hun hmanah hian chung mite zahna hun chu hmangin silai kahrik a ni. Anmahni sun nan ngawi rengin an ding bawk.
Mipui kalkhawmte hi an tawngtai rual a, buai tirh atanga Pathianin a vennaah lawmthu sawiin, an hmakhua atan a puihna an dil a, remna leh muanna an dil bawk.
Manipur-a Zo hnahthlakte hian mahni khua theuhvah an ram veng tura inpe thalai an nei a, hmun hrang hrangah ‘training’ an nei thin. August ni 15-a hun an hman pawh hian chutianga ‘training’ chhuak thalai engemaw zatin rinawmna thu an tiam a, ram leh hnam tana rinawm taka thawk turin an intiam.
Manipur atanga thu dawn danin, Meitei nen hian ralthuam hmanga inbei an nih avangin ‘training’ hi a ngai a, hmun hrang hrangah Zo hnahthlak thalaite a thiamte’n an zirtir thin. Chawlhkar khat chhung ‘training’ an awm a, kar hnih kar thum ‘training’ an awm. A hmatawnga tang turte chu thla khat te an ‘training’ a, mipui huapa tang an nih avangin khaw hrang hrangah mahni zawn theuhvah ‘training’ hi an nei thin.
ITLF hian Churachandpur district-ah hian dawr hawn ni an siam a, Thawhtanni, Nilaini leh Zirtawpni hi dawr hawn ni a ni. Meitei-in hnam dang bulah Zo hnahthlakte hi foreigner, Myanmar atanga a ruka lut tia an puh thin avangin, ram leilung fa an ni tih lantir nan August ni 15 kha dawr khar ni a ni chungin dawr hawn tur an ti a, Independence Day lawm nan dawr an hawng a ni.
Aizawl atangin Central YMA hruaitute’n an telpui a, khuallian pawh Central YMA president R Lalngheta a ni.