India-a damdawi endiknaah hmaih a awm – WHO
Indian police chuan tun hnaia Madhya Pradesh naupang 17 vel thihna an chhuina kal zelah an khuh damdawi ei nia sawi siamtu, Sresan Pharmaceutical Manufacturer neitu chu an man tih an puang.
Naupang kum nga hnuai lamte hi thla hmasa khan khuh damdawi, endik hnua diethylene glycol tel tur aia tam let 500 dawna tam an ei hnuah an thi a ni.
Tamil Nadu-a damdawi siamna company neitu, S. Ranganathan-a hi Nilaini khan Chennai-ah man a ni a, court-ah Ningani khan hruai nghal a nitih police hotuin a sawi.
Court-a a inlan zawhah hian Ranganathan-a hi chhiatna thlenna, Chhindhwara, Madhya Pradesh-ah hruai zui nghal a ni tih Chhindhwara Superintendent of Police Ajay Pandey chuan Reuters a hrilh.
Hetih lai hian Indian thuneitute chuan mipuite chu naupang thihna a thlen hnuah khuh damdawi chi hnih hmang lo turin a ti thar a, World Health Organization (WHO) pawhin damdawi him leh him loh endiknaah ‘fel tawk lo’ leh ‘tih hmaih’a awm niin a sawi.
Thla hmasaa naupang thihna thlentu damdawi ei hi Coldrif niin October 2 khan phal loh bawlhlo a tel avanga hman khapna tihchhuah a lo ni tawh.
Respifresh leh RELIFE-ah pawh diethylene glycol hi a tam lutuk niin Gujarat leh state dangte chuan Nilaini khan an sawi a, ‘bawlhlo hi tûr hlauhawm tak, kal leh thluak tana pawi thei a ni a, a bik takin naupangah thihna hial a thlen thei’ niin an sawi.
WHO chuan India atangin heng damdawi chi thum him lohna hi an dawng tawh tih Nilaini khan Reuters an hrilh a, khawi ramah mah an thawn chhuak lo niin an sawi a. Hetih rual hian UN hnuaia hriselna changtu pawl hian thuneitute hriatpui lohva thawn chhuah pawh a awm thei tih sawi bawk.
“WHO chuan hetiang thil a thlenah hian India-ah hian tual chhunga damdawi hralh tur endik kawngah hian tihfel tawk loh a awm niin a lang a, hei hi a ngaimawhawm hle a ni,” tiin an thupuangtu chuan a sawi.
Indian damdawi siamtute hian a siam nana an hmanraw hman leh an siam chhuah chu an endiktir zel tur a ni a. Ram danga thawn chhuah tur khuh damdawi phei chu kum 2023-a Gambia, Uzbekistan leh Cameroon-a Indian damdawi ei vanga naupang 140 chuang an thih hnuah sorkarin endikna tur a tih bik laboratory-ah endik leh hmasak vek tur a ni bawk.
Sresan Pharmaceutical Manufacturer-in an siam, Coldrif hi ram chhungah chauh hralh nia hriat a ni a. Gujarat thuneitute chuan a dang pahnih hi state dangah pawh hralh a ni tih an sawi a, ram danga thawn chhuah erawh an sawi lo.
Company leh drug thuneitute chuan Shape Pharma siam, RELIFE leh Rednex Pharmaceuticals siam, Respifresh hi thawn chhuah a nih leh nih loh an la sawi lo bawk.
WHO hian a hma khan Coldrif bik hi Indian thuneitute hnen atanga a hlauhawm theih dan an dawn hunah Global Medical Products Alert an tihchhuah leh tihchhuah loh tur a chian tur thu an lo sawi tawh bawk.
India-a drug controller general, Rajeev Raghuvanshi-a chuan a endiktuten factory-a siam laiin a batch tin an lo endik lo palh tih a lo sawi tawh.
Tamil Nadu-a Sresan chuan an pisa leh an factory a khar a. Police-in an chhui mek a, an damdawi siam hralh khap a ni a, sorkar laipuia thuneitute pawhin damdawi siam phalna an neih an tihtawpsak bawk.
Union health ministry chuan state dang paruka damdawi siamna hmun 19 pawh endik a nih thu a sawi a. An zinga pahnih hi Gujarat-a Shape Pharma leh Rednex Pharmaceuticals an ni.
Gambia, Uzbekistan leh Cameroon-ah kum 2022 atang khan Indian siam khuh damdawiah hian ethylene leh diethylene glycol awm tur aia tam a awm avangin naupang tam tak an thi a, India-ah ngei pawh kum 2019-ah naupang 12 an thi bawk a, hei hian khawvela damdawi siamtu ram lian pathumna hmel pawh a bal hle.
India hi damdawi siam tamah US leh China chiah phak lo niin $ tluklehdingawn 50 man an hralh chhuak ziah a, heng zinga a zahve aia tam hi ram danga an thawh chhuah atanga an hmuh a ni.
US-a damdawi hman 40% hi India-a siam niin Africa ramah phei chuan an damdawi 90% zet hi India-a siam a ni.
India-a damdawi endiknaah hmaih a awm – WHO
