India-a sea-bridge sei ber MTHL hawng ta

Mumbai Trans Harbour Link (MTHL), Atal Bihari Vajpayee Sewri Nhava Sheva Atal Setu tia hriat bawk chu mipuite hman theihin hawn a ni ta a.
MTHL hi India sea bridge sei ber a ni a, 21.8 km laia sei niin heta tanga 16.5 km chu tuipui chunga awm niin nitin vehicle 70,000 vel an tlan tura chhut a ni.
Atal Setu hi six-lane lai niin Prime Minister Narendra Modi chuan hawnna a neihah, “Atal Setu hian India in infrastructure lama theihna a neihzia leh Viksit Bharat a pan zel dan a pholang a ni. He project ah hian hnathawk 17,000 vel rawih niin engineer 1,500 vel zet te hman an ni bawk a, hna a siam nasa hle a ni” tiin a sawi.
PM Modi chuan Navi Mumbai ah multiple development project Rs 12,700 crore hu vel senga thawh tur kawngpui leh rel kawng siamna tur te, drinking water, gems leh jewellery leh women empowerment kalpuina tur te a lungphum a phum bawk.
He project chungchang a sawinaah Modi chuan Shiv Sena (UBT) chief Uddhav Thackeray chu selin, “Heng project tam ber te hi State in double-engine sorkar a neih laia kalpui tan a ni a. Sorkar hmasaah khan mipui ten beiseina an nei lo, a chhan chu development project tikhawtlaia a hnuah a man tipunga an commission thin vang a ni. Kum 2016 khan ram chuan hmasawnna a hmu ang ka ti a, tunah hian a finfiahna chu a awm ta a ni” tiin a sawi bawk a.
Kum sawm a sorkar chhunga a hnathawh sawiin Modi chuan, “Tun hma chuan titi ber chu multimillion crore scam a ni thin a. Vawiinah chuan titi ber chu crores sang tel hu project zawhfel chungchang a ni tawh. Northeast ah Bhupen Hazarika Setu leh Bogibeel Bridge kan nei tawh a, Atal Tunnel leh Chenab Bridge, multiple expressway, modern railway stations, eastern and western freight corridor, Vande Bharat, Amrit Bharat leh Namo Bharat trains te leh airport thar hawn te a ni” tiin a sawi.
Nilwande Dam project, kum sawm nga kaltaa thawh tan tawh chu kan sorkar laiin kan zo fel thei a ti bawk a. “Uran-Kharkopar railway line, kum sawm thum kaltaa bul tan tawh chu double-engine sorkar in chak taka kalpuiin a first phase chu vawiinah hman theihn siam a ni ta. Chutiang bawkin Navi Mumbai Metro Project pawh hun rei tak ihkhawtlai hnuah first phase zawhfel a ni tawh bawk. Atal Setu pawh kum sawm ruk chuang plan a ni a, Bandra-Worli Sea Link, a aia a let nga a te zawk pawh kum 10 chhung duhin budget a let li nga velin sorkar hmasa te khan an tipung a ni” a ti bawk.
MTHL Atal Setu zawhfel a nih theih nana State leadership chu fakin Covid-19 pandemic leng chunga an zo fel hma thei chu lawmawm a tih thu a sawi a. “Kan vision chu khua leh tui te chetvelna tihran leh zangkhai nana urban transport infrastructure leh connectivity tihthat a ni. Mumbai International Airport leh Navi Mumbai International Airport rang zawkin pawh a ni thei tawh dawn a, Mumbai atanga Pune, Goa leh South India rang zawkin thlen a ni thei tawh ang a. Mumbai Port leh Jawaharlal Nehru Port Terminus te connectivity a titha bawk dawn a ni” tiin a sawi bawk.
Trans harbour link zawh fel a nih theih nan Modi chuan Japan Prime Minister hlui Shinzo Abe chu a pawimawh thu sawiin a fak bawk a. “He project a steel hmante hian Howrah bridge pali leh Statue of Liberty paruk sakna a daih a ni. He lei zawhfel vat a nih theih nan kan intiam a ni” tiin PM Modi chuan a sawi bawk.