India-ah cheetah no pahnih a piang thar leh

India-ah cheetah no pahnih a piang thar leh
Sheopur district, Madhya Pradesh-a Kuno National Park (KNP)-ah cheetah awm mek no pahnih a piang thar leh a, India-in a rama hetiang zawhte lian chi awmtir thar leh a tumnaah beisei a sang zel.
Chhetah note hi Thawhlehni khan South African cheetah, Veera an tih chuan a hring a, heti hian KNP-ah hian a puitling 12 leh a no 14, an vaiin 26 an awm ta.
Madhya Pradesh Chief Minister Mohan Yadav chuan he thuthar hi X-ah an thlalak nen a dah chhuak a. “Kuno-ah cheetah no thar avangin hlim thawm a awm leh ta. Madhya Pradesh-a ‘Jungle Book’-ah cheetah note an lo tel thar e,” tiin a tar lang.
Yadav-a hian cheetah enkawlna kawnga thawk officer, veterinarian leh field staff te chungah lawmpuina a hlan a. “Rim taka an thawh hahna azarah Madhya Pradesh chu ‘land of cheetahs’ tia hriat a hlawh ta,” a ti.
Chief minister hian cheetah an lo pung leh ta hret hret chuan an state-a tourism industry-ah rah tha a chhuah ngei tur thu a sawi bawk.
“Cheetah an lo pung leh hian Madhya Pradesh hian khualzin hipnaah kawng a sial thar leh dawn a, hna thar pawh min siam ang. A humhalh, a thehlar leh a tihpun kawnga thawk turin kan inpeih a ni,” a ti.
Yadav-a hian Nilaini khan an hungna atangin cheetah dang chu zalen taka KNP chhunga an len theih nan a chhuah bawk a. Heng chhuah thate hian South African cheetah pa pahnih, Vayu leh Agni an zawm ang a, anni hi December, 2024-a lo chhuah zalen tawh kha an ni.
KNP hi Prime Minister Narendra Modi-a’n September 17, 2022-a hetiang sakei a chhuah atang khan African cheetah-te awmna hmasa ber a ni.
Namibian cheetah pariat — a nu panga leh a pa pathum chu khawmualpui dang atanga lak chhuah hmasak berah telin he hmunah hian chhuah a ni a. Ram dang atanga lak luh hi kum 70 chuang liam tawha pelh nasat leh an chenna tihramsak an nih avanga India-a an mang hnua awmtir thar leh tumna a ni.
Tuna no a piang thar leh hi ramhnuaia tihpun tumna kal zel a ni a. December, 2024 khan Modi-a’n Asha tia a hming a phuah chuan no pathum a lo nei tawh bawk.
Hetih lai hian a hma thlaah khan Neerva-i’n a hrin a no pahnih chu an pian hnu lawkah an thi a. January, 2024 khan park-ah hian cheetah 10 zet an lo thi tawh bawk a, hengte hi a puitling pasarih leh a no pathum an ni.