India-ah nightclub kang neitu Luthra unau hruai haw

India-ah nightclub kang neitu Luthra unau hruai haw
Goa-a mi 25 thihna, Birch by Romeo Lane nightclub kang ta neitu unau, Saurabh leh Gaurav Luthra te chu Thailand atangin Thawhlehni khan India panpui an ni.
Luthra unau hi IndiGo flight (6E1064) hmanga phurh haw niin Bangkok tumhmun atangin India huna chawhnu dar 01:45 khan chhuahpui an ni.
Delhi thlenpui an nih hnuah Patiala House Court-ah hruai an ni a, thuneituten kawl an dil a, he chanchin ziah lai hian court thu hriat hman a ni lo.
Luthra unau hi mi tam tak thihna thlentu leh fimkhur lo taka thil kalpuia puh an ni a, an nightclub-a chhiatna a thlen hnu lawk khan IndiGo thlawhna hmangin Thailand-a Phuket an pan a. Kangmei chhuah lai khan Delhi-a inneihnaah an tel nia sawi a ni.
An nightclub a kang tih an hriat leh thi tam tak an awm tih an hriat rualin Delhi-a Model Town-a an pisa biain thlawhna ticket laksak turin an ti nghal a. Inah an lehkha pawimawh lamin an thlawk chhuah zui ta a ni.
Thailand-ah December 9 khan an thlenna khualbuka chaw an ei laiin man an ni a. Thai thuneituten an nihna kimchang leh an zin dan an finfiah hnuah India-a hruai haw turin buaipui zui a ni.
Kangmei chhuak chhui tawhna chinah chuan nightclub-ah khan himna atana dan zam a ni lo va, rikruma tlan chhuahna tur a awm lo va, fire extinguisher tha leh safety alarm pawh a awm lo va, kang thelhtute tana pan harsa takin a kawng pawh a chep hle tih hmuh a ni.
A hmain warning pek an ni tawh thin a, a neituten hmalakna an nei chuang lo va. Club hi phalna mumal tak neia kalpui a ni lo bawk tih FIR ziah luhah tar lan a ni bawk.
He thil thlengah hian manager telin thawktu pali man an lo ni tawh a. Club din tura phalna pekah sorkar department hrang hranga hotu liante pawh rinhlelh awmin thu zawh fiah an ni hlawm.
Club neitu zinga mi, Ajay Gupta-a pawh Delhi-ah man a ni tawh bawk.
Gupta-a hi a tirah chuan neitu nihna nei ve mai mai, inrawlh tam lo angin insawi mah se chhuinaah chuan a inrawlh thuk hle tih hmuh a ni a. A kan lai pawh khan Goa-ah a awm a, rang takin Delhi a pan zui a. Delhi a thlenah a phone a switch off zui a. Gurugram-a an in panin Toyota Innova hmangin a khalhtu nen an chhuak leh a, a phone atangin chhui zui a ni.
Police chuan Delhi-a Lajpat Nagar-a Institute of Brain & Spine-ah kar hmasa khan an man a, man a nih loh nan damdawi inah hian a lut nia puh a ni.