March 31 khan New Delhi-a Ramlila Maidan ah ‘Maharally’ buatsaih niin tunlai India rama harsatna hrang hrangte laka India ‘humhim’ a nih theih nan rally chu neih a ni.
Rally neihna chhan zingah BJP kaihhruai Centre sorkar lai mekin Central probe agencies te hmanga suala a chetdan duhlohna lantirna a ni bawk a, chung zingah chuan tun hnai lawka ED tena an man Delhi Chief Minister Arvind Kejriwal chungchang pawh a tel a ni.
Maha rally hi Indian National Developmental, Inclusive Alliance (INDIA) te huaihawta neih niin Congress te chuan Constitution leh democracy humhim a nih theih nana neih a ni tiin an sawi a. Oppostion hruaitu lawk te an tel tha hle a ni.
Congress leader Rahul Gandhi chuan Narendra modi chuan Lok Sabha inthlanah match fixing tih a tum tiin a sawi a. Inthlan chu cricket match nena tehkhinin Prime Minister Narendra Modi chuan election result chu ‘fix’ a tum a ni a ti.
Congress leader Rahul Gandhi chuan, “Match fixing tih tawngkam inhre tawh ngai em? Umpire tur vak, player te lei leh captain hlaua siam hnuah inkhelhah an chak zawk thin. Kan hma lawkah inthlan a awm dawn a. Tu nge umpire thlang? Narendra Modi a ni,” tiin a sawi a.
“Inthlan pawh a la thlen hma in, kan player pahnih an man tawh a. Narendra Modi hian he inthlan hi fix a tum a ni. Media a nawr vak a, EVMs te a fix a, social media a thunun chungin seat 180 an pel chuang lo vang. Congress chu opposition party lian ber a ni a, inthlan boruak vanglaiin an account tin khawih theihlohin an dahsak a nia” tiin a sawi bawk.
Rahul Gandhi chuan, “Campaign kan duh a, kan hruaitu te state hrang hrangah campaigna tirh kan duh a, poster te tihchhuah kan duh a, mahse, kan resources tinte chu min hmehmihsak vek a, che thei lovin min siam a, eng inthlan nge maw a nih le? Hruaitute vauin an awm a, sum thitltihtheihna hmangin sorkar paihthlakin an awm a, opposition leader te man an ni a. He match fixing ah hian Narendra Modi chauh a inhnamhnawih lo, a corporate friends pathum pali vel ten an tanpui a ni,” tiin Rahul Gandhi chuan a sawi bawk.
Congress president Mallikarjun Kharge pawhin thusawina neihaah PM Modi chuan democracy ah rinna a nghat ve lo a ti a. “Eng vangin nge party hrang hrang hruaitute kan thutkhawm le? He ram humhim a, constitution leh mipui te humhim duhna avanga pungkhawm an ni. PM Modi hian democracy a duh lo, dictatorship a ni a duh ni” tiin a sawi a.
“BJP te hian Constitution draft se chuan hmeichhiate vote neih an remti lovang. Mahse Pandit Jawaharlal Nehru leh Baba Saheb Ambedkar ten adult franchise kalpuiin mipa emaw hmeichhia te tute pawhin right to vote an nei a ni” tiin a sawi bawk.
Kharge chuan BJP te hneh chu mi pakhat tan ni lovin employment pek nan, inflation tihhniam nan, loneitute hnena MSP kalpui nana pawimawh a ni a ti a. “BJP hneh chu mi pakhat tan chauh Arvind Kejriwal emaw Hemant Soren emaw tan chauh a ni lo. Mitin te him nana tihmakmawh zawk a ni. Kum 2024 inthlan chu thalaiten hna an neih nan, inflation tihhniam a nih nan, loneitute MSP atan te inbeihna tur a ni. He indona hi BJP eirukna beih leh Indian constitution humhim nan a ni a. Lungrual turin ka ngen che u a ni” tiin a sawi bawk a.
“A bik takin Punjab CM pawh min thawhpui tha turin ka ngen a. Kerala-ah pawh Yechury leh Raja party te kan bei a, mahse, hetah hi chuan kan tangrual a ni. Constitution humhim a nih chuan mi tin te an him a ni mai” tiin a sawi.
Samajwadi Party supremo Akhilesh Yadav pawhin inthlanah chak inring si eng vangin nge CM in man tiin zawhna a siam bawk a. “Seat 400 chuang kan la ang tiin slogan an siam a, seat 400 chuang la tur khawpa inring tawk te chuan eng vangin nge Arvind Kejriwal leh Hemant Soren te in man” tiin Akhilesh chuan a sawi a.
“Ka ngenna che u chu hneh ang u, thawn let rawh u. In vote hmangin he ram hi in humhim thei. In vote chauhin constitution, reservation leh backward, dalits leh minority te a humhim thei” tiin a sawi bawk.
Communist Party of India general secretary D Raja chuan rally neihnaah thu a sawiah, “Elected leaders heng (Delhi CM) Arvind Kejriwal, (Jharkhand CM) Hemant Soren leh midang te an man hi ka dem takzet a ni” a ti bawk a.
BJP leh RSS te chu ‘constitution ziak danglam tum’ tia puh bawkin, “Fascist agenda rorelna hnuaiah kan awm thei lo. Prime Minister Modi duh anga kan kal zel chuan India chu theocratic state a ni dawn. He ram hian chhiatna a tawk mek a, kan humhim a ngai a ni” tiin a sawi bawk.
Lung in tang mek Arvind Kejriwal nupui Sunita Kejriwal chuan a pasal thuchah chhiarchhuahna a nei bawk a. “Vawiin hian in vote ka dil lo che u. Lung In ah ka awm mek a, ngunthluk taka thil ngaihtuahna hun ka nei a ni. Bharat Mata hi a na tak zet mek a ni” a ti a.
“India thar din ang u. Mi tin te puarna, employment awmna, zirna tha leh health care tha awmna ni se. Ram pumah electricity tha, ram dang atanga lehkhazir tura an lo kalna hmun, huatna awmlohna ram leh justice awmna ram i din ang u” tiin Sunita chuan a pasal Kejriwal thuchah a chhiar a.
Sunita chuan, “Modiji-an ka pasal lung inah a khung a. Kejriwal chu lung inah a tang rei lovang. Ram tana nunna chan freedom frighter ang a ni” tiin a sawi.
PDP leader Mehbooba Mufti pawhin thusawina a neihah India chuan hun harsa a pal mek tiin a sawi a, a chhan leh vang pawh awm lovin lung ina inkhung hmiah hmiahna a thleng reng a ti bawk a.
“Chu chu Kashmir ah kan hmu reng a, ram chhung hmun dangah pawh a thleng a. Jammu and Kashmir chu enchinna hmun laboratory ah hman a ni a, chu mi hnuah plan te chu ram pumah hman leh thin a ni” a tin a. Kejriwal hian BJP zawm se chuan amah puhna leh a thubuai tin te a bo nghal ang, tiin a sawi bawk.
Shiv Sena (UBT) leader Uddhav Thackeray chuan kan punkhawm hi campaign rally a ni lo a ti a. “Kan farnu pahnih Kalpana leh Sunita te thlawp tura lokal ka ni a, dictatorial BJP ten an pasal te lung inah an khung laiin ram pumin kan tawrhpuiin kan thlawp che u a ni” a ti a.
ED, Income Tax leh CBI te hi BJP te thawhpui an ni a, democracy humhim a nih theih nana kan penchhuah a hun ta a ni, tiin a sawi bawk a.
Ruling party BJP chu washing machine tia sawi bawkin thackeray chuan eiruknaa inhnamhnawih te chuan BJP an zawm veleh an thianghlim nghal thin a ti bawk a.
“Loneitu ten Delhi a kal an tum a, BJP ten an remti lo. Sorkar loneitute terrorists tia sawitute hi an kal bo a ngai a, loneituten BJP tena Delhi an pan an remti tur a ni lo” tiin a sawi bawk.
Resolution siam nghal niin Priyanka Gandhi Vadra chuan resolution te chhiar chhuahna a nei thung a.
1) Election Commission chuan kum 2024 inthlanah level playing field awm nan hma a la tur a ni.
2) Election Commission hian Opposition party te laka hluar taka chetla IT, ED leh CBI te hmansual hi a titawp tur a ni.
3) Hemant Soren leh Arvind Kejriwal te chuhah zalen an ni tur a ni.
4) Inthlan hmaa opposition te sum hman theihloha dah hi tihtawp ni rawh se.
5) Supreme Court in electoral bonds chhui chiang tur leh BJP tena sum an lakkhawm dan chhui chiang tur SIT din rawh se, tih te a ni.
Tuna Delhi-a rally turu taka neih hi INDIA bloc leader tena public meeting a huhova nikum June 23-a Patna-a an din hnua an neih leh hmasak ber a ni a. Nikum September thla khan Bhopal-ah public rally neih tum an ni a, mahse, tihhlawhltinin a awm lo. A hnuah Patna ah tenau deuh leh March 17 khan Mumbai-ah Bharat Jodo Nyay Yatra kharnaah tenau deuha neih a ni chauh a ni.
INDIA Bloc ten Ramlila Maidan-ah ‘Maharally‘ turu tak nei hlawhtling
![](https://theaizawlpost.org/wp-content/uploads/Clipboard01-445.jpg)