India-EU inremnaah uaiin atanga car thleng tlawm thei dawn

India-EU inremnaah uaiin atanga car thleng tlawm thei dawn
India leh European Union (EU) inkara Free Trade Agreement (FTA) chu kum 18 zet indawra inbiak a nih hnuah Thawhlehni khan ziah fel a ni ta a. He inremna hian mi tam tak hlimna thlenin uaiin leh zu atanga lirthei lam thlengin India-ah a man a tlawm phah thei dawn.
European Commission President Ursula von der Leyen-i’n ‘mother of all trade deals’ ti hiala sawi inremna hnuaiah hian European ramah Indian bungrua hralhna a inhawng thar teuh dawn a. A lehlam hawiin India-a European thil lak luhte atanga chhiah lak tam tak a tlem dawn avangin thil man a tlawm phah dawn bawk.
European car tha tak tak – Mercedes, BMW leh Audi siamte hi inremna a aw hma chuan lak luhnaah chhiah a man aia tam chawi a ngai thin a. Inremna thar hnuaiah erawh Euro 15,000 man aia to, India pawisaa Rs 16 aia to chin chin lak luhnaah chhiah 40% chauh chawi a ni tawh dawn a. Heti a nih a nuai bi takmeuhvin European car thate man a tlawm phah dawn a ni.
Commerce ministry chuan inremna hnuaiah hian Indian car siamtute thang tha tak a nghawng pawi lohna tur ruahmanna siam a ni tho bawk niin sawi a ni.
India-a lirtheite hi car tê a tih ang, Rs nuai 10 leh 25 inkar man vel hralh tam a ni a. Ministry-a thuneitu sang chuan “Hei vang hian India-a a siamtute a nghawng nat lutuk loh nan Rs nuai 25 hnuai lama lei thei carte chu EU hian India-ah a thawn lut dawn lo va. An siam thei ang a, a thawn luh erawh an rawn ti dawn lo a ni,” a ti.
European sumdawng, a bikin France, Italy leh Spain atanga thil lak luh dang pawh a tawm dawn a. India-a uaiin tha bik lak luhah hian 150% chhiah chawi a ngai thin a, inremna tharah erawh 20% chauh lak tawh tur niin a man tihniam duai dawn.
Hetih rual hian uaiina chhiah lak zat bi hi a hniam nghal thut dawn lo va, kum nga atanga 10 inkar vel siam rem nan a ngai dawn a, a tlawm nghal thut danw lo va. Cognac, premium gin leh vodka te chu India-ah a la tlawm dawn tho a ni.
Hei pawh hi lirthei ang bawkin Euro 2.5 aia tlawm chu India-ah lak luh a ni dawn lo va. Indian uaiinte pawh EU member ramah thawn chhuah ve a ni bawk ang.
Europe hi damdawia inenkawlna hmanrua leh damdawi nei tha an ni a. Inremna thar hnuaiah hian cancer leh natna bik enkawlna damdawi lak luhte chu India-ah a tlawm sawt thei dawn a, damdawi hmanrua lak luh pawh a man a tla tel dawn bawk a. Inremna hnuaiah hian khawvela damdawi siam chhuaktu lian ber ram ni phak, India atanga European ram 27-a thawn luh awlsam zawk tura tih a ni bawk.
Inremna tharah hian Europe atanga thlawhna bungrua (spare part), mobile phone leh high-tech electronic item lak luhah chhiah lak loh turin tih a ni bawk a. Hei hian India-a nawmsakna hmanrua siam chhuah man a tihniam ngei dawn a, a hmangtute tan hamthatna a ni dawn a; mobile phone man pawh tlawm thei tura ngaih a ni.
Iron, steel leh bawlhlo thil siam chhuaha chhiah lak pawh tihtawp tum a ni a. Heti a nih chuan in sakna leh industry-a hman chi tam tak a tlawm dawn a ni.
India leh EU-in inremna an ziah tak hi Indian bungraw thawn chhuahna kawngah hlawkna tam tak a awm dawn a, puan leh la, savun leh tlereuh siam chhuak tam India-in EU ram 27-ah inzawrhna awlsam zawk a neih tawh dawn avangin an hlawkpui hle tura ngaih a ni.