India ram zalenna ni lawmna kalzelah in tina hnam puanzar zar beihpui ‘Har Ghar Tiranga’ kalpui leh India ramin zalenna a hmuh atanga kum 75 a tlin lawmna, Azadi Ka Amrit Mohatsav (AKAM) hmawr bawkna atana ruahman, Meri Maati Mera Desh campaign pualin Thawhtanni khan Aizawlah Har Ghar Tiranga rally neih a ni a. Bawrhsap Nazuk Kumar chuan DC office tual atanga vailiamin, MINECO thleng kawng zawh a ni.
Bawrhsap chuan Har Ghar Tiranga rally leh Meri Maati Mera Desh campaign-a tel zirlai leh sawrkar hnathawkte chu zalenna neih hlut zia hre thar leh tura chahin, “Zalenna hnuaiah hmasawnna leh hamthatna hrang hrang kan nei a, a ngaihlutu leh chhawr tangkaitu nih kan tum theuh tur a ni,” a ti. Ramin zalenna a neih theihna’na tha thawhtute inpekna theihnghilh loa chhawmnung zel turin a sawm.
Rally-a telte hian ram tana inpekna tithar leh tura thutiam an la a; kum 2047 hma ngeia India ram hi ram hmasawn leh intodelh a siam turte, sala kun thinna rilru paih bo vek turte, ram leh hnam ziarang hausakna chawisang turte, inpumkhatna tichak a, ram venghimtute zahna lantir zel tur leh, khua leh tuite mawhphurhna hlen chhuak turtein thutiam an la a ni.
Independence Day 2023 lawmna puala Har Ghar Tiranga beihpui neihah August 13-15 chhungin in tinah India hnam puanzar zar beihpui thlak a ni.
India flag zar beihpui pual rally
