India-in ASEAN intawh khawm thleng dawn

India-in ASEAN intawh khawm thleng dawn
India chuan Nilaini leh Ningani hian ASEAN ram 10 leh an thawhpui ram dang thenkhatte nena intawh khawm a thleng dawn a, hetah hian firfiaka chetna leh kal fawrte laka vaukhanna awm thei lo hmachhawn dan tur an sawiho ang.
Conclave hi mi firfiakte beihna kawnga thiamna bik neiten ASEAN Defence Ministers’ Meeting-Plus kaihhruaina hnuaia ruahmanna an siamte sawihovin an chhehvel himna tura kal zel dan tur an sawiho ang.
ADMM-Plus hi ASEAN-a tel ram 10 leh an thawhpui ram pariat – India, China, Australia, Japan, New Zealand, Republic of Korea, Russia leh US telna a ni.
EWG conclave hi Delhi-a neih tur niin India leh Malaysia ramten an kaihruai ang.
Defence ministry chuan ASEAN member ram 10 bakah an thawhpui ram pariatte leh Timor Leste leh ASEAN Secretariat an tel dawn tih a puang.
“India chuan a vawi khat nan EWG on counter-terrorism hi a kaihruai ve dawn a ni,” an ti bawk.
Defence Secretary Rajesh Kumar Singh chuan Nilainia intawh khawm hawnnaah thu a sawi ang a. Tun hi EWG on counter-terrorism-in kum 2024-2027 chhunga kal dan tur a ruahmana an intawh khawmna hmasa ber tur a ni.
“Sawihonaah hian firfiak leh uchuak taka chea ngaih dan neite atanga hlauhawm thleng thei tam mek zel chu awmze nei taka lo dala lo bei let dan tur an khel ber dawn a ni,” tiin ministry chuan a sawi.
“Meeting-ah hian ASEAN leh an thawhpui ramten khawmuala an sipaite lo chet tawh thin dan an inhrilh tawn ang a. 2024-2027 chhunga hmalakna tur, thawhhona tur, seminar leh workshop neih dan turte an ruahman dawn a ni,” a ti bawk.
ADMM-Plus hian kawng sarihah thawhhona tur bik an duang a. Hengte hi firfiakna beih let, tuipui himna, muanna vawn nun zelna tura beihpui thlakna, intanpui tawnna leh cyber security te a ni.
EWG hi hemi hmalakna a chak zawk nan leh ruahmanna duangtu atana din a ni.
EWG hi ASEAN member ram leh an thawhpui ram pakhat ve ve zelin kum thum chhung hian an kaihruai thin a. A kaihruaitu nih hi an tum ruahmana pharhtu, kaihhruaina siamtu leh kal zel dan tura ngaihtuahna seng bertu a ni.