India chuan Bangladesh nena an inkar a khik mek karah Thawhtanni khan a thenawm ram atang hian kawngpui hmanga jute atanga siam chhuah leh hruizen lak luh a khap.
Directorate General of Foreign Trade (DGFT)-in hriattirna a tihchhuahah heng thilte hi Nhava Sheva Seaport kaltlang chauhva lak luh turin a ti a ni.
“Bangladesh atanga India-Bangladesh Border ramria kawngpuia lak luh khap a ni,” a ti a. “Bangladesh atanga India-a thil lak luh hi chhan tha tak avangin khuahkhirh a ni,” a ti bawk.
Thenawm ram atanga lak luh khap zingah hian jute bleached leh unbleached woven fabric leh la lam kaihhnawih te, jute atanga siam twine, cordage, hruizen leh ip te a tel.
June 27 khan India hian jute atanga siam chhuah thil eng emaw zat leh puan chei mawite chu Bangladesh atang hian khawmuala kalpuia lak luh a lo khap tawh a. Maharashtra-a Nhava Sheva seaport kaltlang chauhva lak luh a phal.
April leh May-ah pawh khan India hian hetiang khapna hi a lo siam tawh a. May 17-a khapna a chhuahah chuan a lawngchawlh hmunte chu thawmhnaw siamsa leh ei tur ang chi Bangladesh atanga lak luh a khap a ni.
April 9 khan India hian Nepal leh Bhutan tiam lovin Bangladesh-in Middle East, Europe leh ram danga thil thawn chhuah tur a chhekna hmunte chu hman a lo phal lohna a lo tichhuak tawh bawk.
Hetiang khapna India-in a siam hi Bangladesh-a sorkar lailawk ding mek hruaitu, Muhammad Yunus-a’n China a tlawh tuma sawi zui hlawh tak thil a sawi hnua a siam vek a ni.
Yunus-a thil sawi hi New Delhi chuan a lawm lo va, politics hruaitute pawhin party bil sawi lovin tha an tih loh thu an sawi hlawm.
India-Bangladesh inkar hi Yunus-a sorkarin a ram chhunga sakhaw zuitu tlem zawk, a bik takin Hindu-te tawrhna a khap daih theih loh atangin a chhe zual.
Bangladesh hi la leh thawmhnawa sumdawnnaah India-in a elpui ber a ni a. An inkara sum che vel hi 2023-24 khan US $ tluklehdingawn 12.9 a tling a. Kum 2024-25 khan India-in a thawn chhuah chu US $ tluklehdingawn 11.46 niin a lak luh chu US $ tluklehdingawn hnih a ni thung.
India-in Bangladesh atanga jute kaihhnawih lak luh khap
