Site icon The Aizawl Post

India in Brone Medal hlawhchhuak

Badminton hmanga Assia khawmual ramte inelna lian Badminton Asia Mixed Team Championships-ah India chuan semi-final-ah China an hneh zo lova, Brone Medal an hlawhchhuak.
India hian China lakah bul an tan tha lo va, singles-ah an tlawm nghal ve ve. Mipa singles-ah HS Prannoy chu Lei Lan Xi lakah 13-21, 15-21 in a tlawm a. Hmeichhe lama India chhuarvawr Olympic medallist PV Sindhu chuan Gao Fang Jie lakah chhe takin bul a tan a, set khatnaah point kua chiah a hmu. Set hnihnaah insiamtha in, set la let mahse set thumnaah a tlawm zui leh a, . Sindhu hian awlsam takin set khatna la nghal mah se a talbuai zui ta tlat thung a. A khingpui lakah hian 9-21, 21-16, 18-21 in a tlawm ringawt. India innghahna pahnih an tlawm zawn vangin an dinhmun a chhe nghal viau a, China hian 2-0 in hma an hruai nghal.
Mimal inelna lamah an tlawm zawn hnuin doubles lamah India hi an chetha ve thung. Dhruv Kapila leh Chirag Shetty te inkawp chuan Ji Ting leh Zhou Hao Dong te inkawp chu 21-19, 21-19 in an hneh a, India in beiseina thar an nei. Kapila leh Shetty ten hnehna an chan hnu hian Treesa Jolly leh Gayatri Gopichand te inkawp chuan China tan Liu Sheng Shu leh Tan Ning te inkawp chu 21-18 13-21 21-19 in an hneh zui leh a, 2-2 in an inhnehtawk ta chiah.
2-2 a an inhnehtawk hnu hian mixed doubles hmangin final lut tur zawk tihchian zui nghal a ni a. Inkhel pawimawh takah India tana inkawp Ishaan Bhatnagar leh Tanisha Crasto te inkawp chuan Jiang Zhen Bang leh Wei Ya Xin te inkawp an ngam ta lo viau thung a. India tana inkawpte hi minute 34 chhung lekin an khingpui lakah 21-17, 21-13 in an tlawm a. China lakah 3-2 chak loin final an lut zo ta lo a ni.
China lakah uiawm takin tlawm mah se India hi Badminton Asia Mixed Team Championships a an chet that ber tum a ni thung a, he inelnaah hian a vawikhat nan medal an hlawhchhuak. India hi Group B-ah UAE, Malaysia leh Kazakhstan te nen an awm tlang a., Group champion an ni a, quarter-final-ah Hongkong hnehin semi-final an lut a. Semi-final ah Badminton thiam ram China an paltlang zo ta lo a ni.

Exit mobile version