Indian police ten Chinese spy a nih theih rinhlelh avanga an man parva chu thla riat an hren hnuah an chhuah zalen ta niin The Indian Express chuan a tarlang. He parva hi May 2023 khan Mumbai port bulah man a ni a, January ni 30 khan chhuah zalen a ni ta a ni.
He parva hi an man lai hian a keah zungbun ang deuh pahnih inhreng beta hmuh a ni a, chinese hawrawp ni a hriat a inziak bawk a, zungbun pakhatah chuan chip a awm niin an sawi bawk. Police ten inenthlakna hmanraw pakhat a nih theih rinhlelh thuah he parva hi manin Mumbai-a Bai Sakarbai Dinshaw Petit Hospital for Animals-ah endik turin an thawn a, mahse, he parva hi inenthlakna hmanrua ni lovin Taiwan-a open-water racing atana an hman sava India-a rawn thlawk thleng a ni tih an hrechhuak ta a ni.
Tun hi hetianga spy ni a rinhlelh avanga parva an man vawi khatna a ni tawh lo va, March 2023 pawh khan parva pahnih chu Odisha-a Puri enthlatu ni a rinhlelh thuah an lo man tawh a, heta an parva man pakhat zawk hi a keah lehkhaa intawn beta chutah chuan “REDDY VSP DN” tih a inziak a, parva pakhat zawkah chuan camera leh microchip ang tak invuah an hmu bawk a ni.
Hmanlai atang tawhin parva hi inenthlakna leh thutawn thawn nan an lo hmang tangkai tawh thin a, Khawvel Indopui Pakhatna-ah pawh khan parva te chu camera te reuhte pai tirin hmelma te ram chhungah an thlawh luh tir thla lak ruk nan leh thu inthawn nan hlawhtling takin an lo hmang tawh thin niin International Spy Museum chuan an tarlang a ni, 1950s thleng khan spy atana parva hman hi an la ching niin an tarlang bawk.
Parva spy lar tak pakhat chu Cher Ami kha a ni. He parva hian a hna hnuhnung ber October ni 14, 1918 khan thawkin, sipai 194 nunna a chhanhim sak nghe nghe a ni. He parva hi German te nena indo sipai ten thu thawn nan an hmang a, mahse, German silaimu-in a deng fuh a, hliam tuar chunga a thu ken chu thlawh thlen pui hram a, chu chuan French sipai 194 nunna a chhanhim phah ta a ni. A hliam avang hian Cher Ami chu June ni 13, 1919 khan a thi a, mihuaisen te chawimawina French Croix de Guerre an hlan nghe nghe a ni.
India-in China spy ni a rinhleh avanga a man parva a chhuah zalen ta
