India-in do mah se China-inBrahmaputra hnarah tui khuah tan

India-in do mah se China-in
Brahmaputra hnarah tui khuah tan
India-in a hmaa a duh loh thu lo sawi tawh mah se China chuan Tibet leh India-a luang lui tui khuah hna chu Inrinni khan a tan a, Premier Li Qiang-a chuan hna bul tanna hi a hmanpui nge nghe niin an sorkar chanchinbuin a tar lang.
Beijing hian December thla khan Tibet-a Yarlung Tsangpo tia sawi, India-a Brahmaputra tia sawi ve thung lui khuah tur hi a pawm a, an rama boruak tibawlhhlawh thei electric siam chhuahna tihnep tum nan Tibet ram bawra eibar dinhmun chawi kan nana a tih a ni.
“Electricity a siam chhuahte chu hmun dangah pawh pek chhuah a ni ang a, Tibet-a chengte mamawh pawh a phuhru thei danw bawk a ni,” tiin sorkar news agency Xinhua chuan Tibet chhimchhak, Nyingchi-a hna tan nana inkhawm buatsaihah Premier Qi-a hian a sawi niin a tar lang.
Tuikhuah hi a puitlin hunah chuan khawvela tuikhuah lian ber, China lailia Yangtze River-a Three Gorges Dam aiin a lian dawn a. Hetih rual hian a tui hi vawi leh khata luan liam chuan a thlanga India leh Bangladesh tana hlauhawm tak a ni thei dawn.
Tuikhuah behchhan hian hydropower station panga din tel a ni dawn a, a vaia senso tur hian $ tluklehdingawn 167.1 ni turin Xinhua chuan a tar lang.
India chuan January thlaah tawh khan China-in Tibet-a hna a thawh tur hi an ngaihven hle tih a sawi a, ‘kan thlithlai reng ang a, kan himna tur ang zelin a tul angin kan che ang’ tih a sawi.
Hemi tum hian Indian foregn ministry chuan China chu ‘Brahmaputra lui thlang lama awm state-te tana hlauhawm lo leh an chhawr theihna titlem thei ang zawnga engtin mah che lo turin a hrilh’ tih a sawi bawk.
A chuan hnuai lama awmte tan tuikhuah hi a hlauhawm thei dawn tih sawi a awm bakah hian khualrel thil humhalhtu tam tam chuan Tibetan tlang chungzawl rama hetiang hna lian lutuk thawh hian thil nung awm tam tak awm dan a tibuai thei dawn niin an sawi ve bawk.
India leh China hi Asia-a inthenawm ram lian ve ve leh inhal tak an ni a, ramri kilometre sang chuang intawm niin heng hmunah hian sipai sang tel an dah ve ve a ni.