India-in firfiak huangah pawl 45 dah
Ministry of Home Affairs (MHA) chuan Unlawful Activities (Prevention) Act tlawhchhanin firfiak pawl leh dan lova pawl dinte ennawnin a tichhuak thar a. Heng pawlte hi firfiaka India laka che thin leh ram himna tiderthawngtu tiin a sawi.
MHA hian UAPA Section 35-na tlawhchhanin pawl 45 chu firfiak pawlah a dah a. Section 3(1) tlawhchhanin pawl dang 22 chu dan lo pawl (unlawful association) huangah a dah bawk.
Heng pawlte hi helna, inlak hranna leh India-a tharum thawhna thlentu an ni hlawm a. MHA hian a list hi a khât tawka siam thain a ennawn thin a ni.
UAPA tlawhchhana hetiang list-a telh pawlte lakah hian dan angin khawng taka rorelna kalpui a ni thin a, an thil neih khawih chet theih loh thlengin tih theih a ni.
UAPA, 1967 hi India-in firfiaka chetna a dona dan niin vawi tam tak ennawna tihchak a ni tawh a, kum 2008-a Mumbai khawpui beih a nih hnuah phei kha chuan uluk lehzuala ennawn niin a huam chin pawh nasa taka zauh a ni.
Firfiak pawla telhte hi chu India-a an chet vel khap niin sum leh pai an neihte pawh tihchet theih lovin dah a ni a. An mi leh sate pawh sum an tuak leh mi dang an pawla tel tura sawm khap a ni a, an pawla tel chu dan anga na taka tih theih a ni.
Indian sorkar hian a ram chhung china hel pawl leh kal fawr pawlte dinhmun thlithlaiin ram tana hlauhawm an nih dan azirin huang hrang hrangah a telh thin.
India-in firfiak huangah pawl 45 dah
