Delhi Police chuan Pathiannia INDIA-in Delhi-a Ramlila Maidan pana kawng an zawh lai khan an zinga mi, Jantar Mantar pana kal mi 22-te chu Minto Road-ah hrengin an lakah FIR an ziak lut tih Thawhlehni khan an sawi.
INDIA hian Ramlila Maidan thlenga kawng zawhin Chief Election Commissioner (CEC) Gyanesh Kumar-a bâng tura an phutna leh Election Commission of India (ECI)-in electoral roll special intensive revision (SIR) a kalpui duh lohna an lantir.
Police chuan kawng zawh leh pun khawmah hian mi engzat nge kalkhawm chiah an sawi lo va, mi 50,000 vel nia sawi a awm a. Thuneitute chuan Ramlila Maidan-a hun hman phal a nih laiin zirlai thenkhatten pun khawm phal tawh lohna, Jantar Mantar lam an pan niin an sawi a ni.
Jantar Mantar lam pana kawng zawh hi Disha Students’ Organisation leh Revolutionary Workers’ Party of India (RWPI) niin tlai dar 5:00 velah a ni a. Police leh paramilitary force-ten Minto Road-ah an dang a, bus pahnih hmangin Dwarka Sector 23 leh Jafarpur Kalan Police Station an panpui a ni.
Police station pahniha lakte hi Thawhtanni zing dar 2:00 velah chhuah leh an ni.
An lakah hian Bharatiya Nyaya Sanhita (BNS) section hrang hrang tlawhchhana FIR ziah luh a ni a, heng zingah hian thupek zawm loh te, phal lohna hmuna luh thubuai te pawh a tel.
Kawng zawh huaihawttu pawla member-te chuan police-te hian hmeichhiate pawh telin a hnuhin bus-ah an hnuk lut a, tharum an hmang nasa niin an sawi a. Hmeichhe pakhat phei chu an hren lai hian chauvin a tlu niin an sawi.
RWPI member pakhat, Sujat Rait-a chuan an zinga pakhat chu darkar 23 chhung hren niin a sawi a. Tumah tibuai lo leh buaina siam lovin RWPI leh Disha Students’ Organisation huaihawtin Ramlila Maidan atangin Jantar Mantar panin kawng an zawh a, an thil phut chu Jantar Mantar chu lungawi loh leh pun khawmna hmun atana hman atana phal leh SIR tihtawp a ni tih a sawi.
INDIA kawng zawhnaah mi 22 lakah FIR ziak lut
