India leh China-in an mite inpawh theihna tura kal remti

India leh China-in an mite inpawh theihna tura kal remti
India leh China chuan inlaichinna tha nei zel tura hma la zui zelin an mite ve ve inpawh tawn theihna tura thil kalpui an remti dun a. Hemi atan hian thlawhna inthlawh tawntir leh te, chanchinbumite kawm leh inkungkaihna an neih kum 75-na lawm te pawh a tel.
Thawhlehnia Beijing-a ramri chungchang sawia Working Mechanism for Consultation & Coordination (WMCC) an thutkhawm tuk, Nilaini khan foreign ministry aiawhte an inbe zui leh a ni.
Heng inkawmna chi hnihah hian New Delhi leh Beijing hian kum 60 chhunga an inkar chhiat lai ber, Line of Actual Control (LAC) hrul, Ladakh sector-a an inepna tihtawp tura titawpa nikum October thlaa an remtih tawh chhunzawm zel tha an ti ve ve.
October thla khan Prime Minister Narendra Modi leh President Xi Jinping te chu Russia-a Kazan khawpuiah inkawmin ramria an inepna titawp turin an inrem a, hemi hnuah hian kawng hrang hrangin inpawh theih nan hma lak zel a ni.
Nilainia thutkhawmah hian January 27-a Indian Foreign Secretary Vikram Misri leh Chinese Vice Foreign Minister Sun Weidong te inkawm tuma inlaichinna tha zawk neih theih dan tur an sawite a taka tihpuitlin dan tur rahbi hrang hrang an sawiho.
“An mite ve ve inpawh tawn theihna tur siam turin rem an ti a. Hemi atan hian thlawhna thlawhtir te, chanchinbumi kawm leh inkungkaihnain kum 75 a tlin lawmna huaihawt pawh a tel,” tiin sorkar thuchhuah chuan a tar lang.
“Ram pahnihte hian tih dan thin pangngai anga kum 2025-a Kailash Manasarovar Yatra chhunzawm pawh tha an ti,” a ti bawk.
Thlawhna inthlawh tawntir hi Chinese lamin an duh a ni a, visa khuahkhirhna hlih leh zau zawka insumdawn tawn an duh bawk.
Ram pahnih hian kumina inpawh tawnna tur leh tih tur hrang hrang an duang a, ‘a tahtawl zela inbiakna pawh kalpui’ ni se an ti bawk niin India sorkar thuchhuah chuan a tar lang.
External affairs ministry-a Joint Secretary (East Asia) Gourangalal Das chu inbiaknaah hian a tel a. China atang hian foreign ministry-a Department of Asian Affairs Director General Liu Jinsong a tel ve thung a. Das-a hian Thawhlehnia WMCC thutkhawmah khan India aiawhte a ho tawh bawk.
Sorkarin thu a chhuahah chuan ram pahnihte hian Modi-a leh Xi-a an inkawm hnu khan kawng hrang hrangin inpawh lehna turin hma an la tih a tar lang a. October hnuah khan foreign minister-te vawi hnih an inhmu tawh a, Special Representative-te pawh an inkawm tawh bawk a. Heng hotu lawkte inkawm hian nghet leh thuk zawka inkungkaihna tur thil an sawi thin niin an tar lang.
January thlaa foreign secretary leh Chinese vice foreign minister inbiak khan kum 2020 atanga tihtawp tawh, Kailash Mansarovar biakzin chu chhunzawm leh an rem ti a, thlawhna inthlawh pawh ni se an ti bawk.
India-China inkar hi April leh May, 2020-a Ladakh sector-a an inep hnu leh June thlaa Galwan Valley-a sipaite an inphek suala India sipai 20 leh Chinese sipai pali vel an thih hnuah khan an inkar a chhe hle a. Kum 1962-a ramria an indo hnua an inkungkaihna a chhiat lai ber a ni hial.
Hemi hnuah hian WMCC hnuaiah leh sipai hotute vawi tam inbiakna a awm tawh a, Pangong Lake kam leh Gogra leh Hot Springs vela an sipai dahte pawh an hnuk kir a. October 21, 2024 hnu khan an inep nat zualna lai, Demchok leh Depsang-a an sipai la dah ve ve pawh an hnuk kir zui bawk.
Tun hnai lehzualah Modi-a’n China nena an inkungkaihna chungchang a sawi chuan Beijing a tilawm hle a. Inlaichinna thuk zawk neihna kawngah hei hian awmzia a nei zui hle a ni.