India leh China te chuan ramri buaina an neih te chu an leader te pahnih inbiakna neih hnuah tihnep ni se an ti tiin senoior Indian official te chuan an sawi.
Prime Minister Narendra Modi leh Presient Xi Jiping te chuan South Africa-a BRICS summit neih pengah inbiakna an nei a.
Beijing chuan inbiakna chu Modi-an ngenna a siam avanga neih an nih thu a sawi a. India leh China inlaichinna hi tun hnai kum thum chhungin a chhe hle a ni.
Ram lian pahnihte hi Himalayan region-a ramri an neih Line of Actual Control (LAC) 3,440 km laia thuiah an inngur nasa hle a ni.
Ram pahnih hruaitu lawkte hi Johhanesburg-a BRICS ram – Brazil, Russia, India, China leh South Africa te Western ram te kaihhruai ram intelkhawm te el tura indin tena inhmukhawmna an neihna pengah an inhmu dun a ni.
Indian Foreign Secretary Vinay Kwatra chuan ram pahnih te chuan LAC a sipaite laksawn an remti dun tiin a sawi a.
“Prime Minister Modi chuan border area-ah remna leh muanna a awm a ngai a, LAC zah chu India-China inlaichinna pangngaia a awm nana tihmakmawh a ni a ti,” tiin Kwatra chuan a sawi.
“Ram pahnih hruaitute chuan an official pawimawhte chu LAC a inngurna awm tihreh a nih theih nana hma la nghal turin an hriattir,” tiin a sawi zui bawk.
China Foreign Ministry pawhin thuchhuah a siamah ram pahnih hruaitute chuan ‘China-India inlaichinna leh shared interest neih te uluk taka sawi dunna an nei a ni’ tiin a sawi bawk a.
“President Xi chuan China-India inlaichinna siamthat chu ram pahnih leh an mipuite bakah khawvel leh helai region a remna leh muanna a awm theih nana pawimawh a nih thu a sawi,” tiin a tarlang bawk.
Ram pahnih hruaitute chuan ram pahnih inlaichinna pawimawhzia sawi dunin border issue pawh a tha thei ang bera chinfel ni se ti dunin border region a remna leh muanna a awm theih nan tanho an remti tiin sawi a ni bawk.
Indian Express newspaper chuan ram pahnih hruaitute inbiakna neihah hian tawng lettu emaw note-taker te an awm lo tiin a tarlang a. Xi leh Modi te hi kum 2022-a G20 summit kha an inbiak hnuhnun ber a ni a.
Kumin September 9 leh 10 a Delhi-a India-in G20 summit a thlen turah Xi chu a tel ngei tura ngaih a ni bawk.
India leh China-in hmalak dun remti
