India leh Malaysia ramten thawhhona nghet zawk siam
Indian Prime Minister Narendra Modi leh Malaysian Prime Minister Anwar Ibrahim chuan Pathianni khan sumdawnnaah thawhhona nghet zawk siam tura intiamin semiconductor, ram venhimna leh thil danga thawhhona huang zauh an tum bawk.
Modi-a hian Asian chhimchhak ram hi ni hnih chhung a tlawh a, August, 2024-a ram pahnihten comprehensive strategic partnership an siam hnua a tlawh lehna hmasa ber a ni a, vawi thum a tlawhna tur a ni thung.
Anwar-a chuan an thawhhona tur hi kawng hrang hrangah thuk zawkin a ni a. Heng zingah hian sumdawnna leh investment, ei leh ina inpuih tawnna leh chatlak awm lohna tur, ram venhimna hriselna leh tourism pawh a tel tih a sawi.
“Kan thawhhona tur hi a lian thamin kan hlawkpui hle dawn a, hma lam pawh kan pan zel kan inbeisei a, sorkar pahnihin tihlawhtling turin chak zawkin hma la turin kan che dawn bawk a ni,” tiin an inawpna khawpui Pitrajaya-a a chenna ina, Modi-a a mikhual hnua thuthar lakhawmtute an kawmnaah a sawi.
An inkawm hnuah Anwar-a leh Modi-a hian thawhhona tur inremna chi hrang hrang 11 an siam a. Heng zingah hian semiconductor, chhiatrupna thlena hmalak dan tur leh muanna a awm theih nana chet lak dan tur te pawh a tel.
Anwar-a chuan India leh Malaysia hian ramri pela thiltihna tual chhung pawisa hman tam a nih theih nana hmalak ni se an ti a, nikum chhunga an pahnih inkara sumdawnnaa sum virvelin $ tluklehdingawn 18.6 a tling chu a lawmawm tak zet tih a sawi bawk.
Malaysia hian India-in Malaysia-a Sabah state, Borneo thliarkara consulate din tuma hma a laknaah a pui dawn tih Anwar-a chuan a sawi bawk.
Modi-a hi Malaysia-a Indian awmte nen an inkawm bakah industry leh sumdawng aiawhte a kawm a. A cham chhung hian 10th India-Malaysia CEO Forum chu hman a ni dawn bawk tih Indian foreign ministry thuchhuah chuan a tar lang bawk.
India leh Malaysia ramten thawhhona nghet zawk siam
