India leh South Korea chuan kum 2030-ah an insumdawn tawnna chu a let hniha tipung dollar tluklehdingawn 50 tlin an tum avangin energy, leilung hauhsakna pawimawh bik, lawng sakna, semiconductor leh steel lama thawhhona tihpuna eibara inzawmna tihchangtlun an tum thu an sawi.
India-in an sumdawnna rualkhai zawka kalpui a duh bakah South Korea-in khawvel economy thang chak berte nena insumdawn tawnna tam zawk a duh vangin New Delhi leh Seoul hian kum 2010-a sumdawnna kawnga inremna an siam tawh tihchak tharna turin inbiak zel leh chak zawka kalpui an remti a ni.
President Lee Jae Myung-a chu ni thum cham turin India-ah a zin mek a, kum riat hnua South Korean president-in India a tlawh hmasak ber a ni a. An ram sumdawng 200 velin an zui a ni.
Indian Prime Minister Narendra Modi-a nen Thawhtannia an inkawm zawhah Lee-a chuan, “Ram pahnihte inkara eibara thawhhona kalphung tihchangtlun kan tum a, hei hi a ruala thanna tur khawlpui thar siam a ni,” a ti.
Ram pahnihte hian a vawi khat nan ministerial-level economic cooperation committee an siam a, Lee-a chuan nuclear power plant, energy him chi bakah sumdawnna leh investment-ah te thawhhona an tichak dawn tih a sawi.
Iran indonain khawvel pum huapa energy thawnna a tihbuai avangin India leh South Korea pawhin energy lakna leh thil siamna atana hmanraw pawimawh lakna mumal tak neih theihna turin an thawh dun zel dawn tih Lee-a chuan a sawi bawk.
Modi-a chuan Lee-a’n a tlawh chu thil pawimawh tak a nih thu sawiin ram pahnihte hian thutlukna pawimawh tak tak an siam a, tuna an insumdawn tawnna chu dollar tluklehdingawn 27 vel a nih laiin kum 2030-ah chuan dollar tluklehdingawn 50-ah tihpun a ni dawn tih a sawi.
“Vawiin hian kum sawm lo awm tur hlawhtlinna chanchin lungphum kan phum a ni,” tiin Modi-a chuan ram pahnihte inkara tun hma atanga inzawmna nghet tak, kum zabi eng emaw zat kalta atanga lo awm tawh chu a sawi bawk.
Indian Trade Minister Piyush Goyal-a pawhin South Korean Trade Minister Yeo Han-koo nen an inbiak thu sawiin trade pact kalpui leh dan tur leh siam that dan tur an sawi dun a, industry, energy him leh digital trade-a thawhhona thuk zawk siam theihna tur kawng hrang hrang an dap bawk.
A hnuah Goyal chuan joint business forum-ah, “Chak taka thawh kan remti,” tiin a sawi zui bawk.
Lee-a chuan forum-ah hian India-in AI-a theihna a neih leh South Korea-in thil siam chhuah lama hmasawnna nasa tak a neih avangin thawhhona lian tak siam theih a ni a, chutih rualin lawng saknaa thawhhona chuan industrya inthlunzawmna bung thar a kai dawn tih a sawi bawk.
Forum-ah hian South Korean company lar tak tak – Samsung Electronics, Hyundai Motor leh LG Group executive-te an tel a ni.
A hranpain South Korea-a POSCO Holdings chuan Thawhtanni khan India-a JSW nen Odisha-ah joint steel plant siam an tum thu an sawi a. POSCO-in kum 2031 tawp thlenga a investment chu $tld 1.09 vel a nih rin a ni.
Odisha-ah hian kum khata ton maktaduai ruka rit steel siam theihna plant dinna tur thawhhona siam hi kar hmasa khan puan a ni.
India leh South Korea inkara sumdawnna $ tld 50 tlintir tum
