India leilunga tennis khel tur Kyrgios, Medvedev, Rybakina

India leilunga tennis khel tur Kyrgios, Medvedev, Rybakina
December ni 17 hian Bengaluru khuaah tennis inelna pakhat World Tennis League (WTL) an tan dawn a, he tournament-a inlan tur hian top international star rualin India lam an hawi mek.
Tel tur langsar zingah hliam avanga kumina match nga bak la khel lo 2022 Wimbledon finalist Nick Kyrgios, US Open champion hlui Daniil Medvedev leh 2022 Wimbledon winner Elena Rybakina an tel.
Kum 2002 atanga khelh tan WTL hi ni li chhung awh tur niin, kumin hi a vawi lina tur a ni a, UAE atangin India-ah an sawn a, SM Krishna Tennis Stadium lamah tennis star hraw engemawzat an inlan ve thung dawn ta a ni.
Medvedev, Rybakina leh Kyrgios-te bakah tennis game-a hming hraw dang – French star Gael Monfils leh women’s World No 2 pawh lo ni ve tawh Paula Badosa-te’n Bengaluru khawpuia inelna hmachhawn an tum thu an tichiang tawh.
He league-a Indian player inlan tur chiang tawh chinte chu tunhnai lawka top-level tennis chawlhsan ve ta Rohan Bopanna bakah Sumit Nagal, Yuki Bhambri, Ankita Raina, Shrivalli Bhamidipaty leh Maaya Revathi-te an ni.
World No. 5 ni mek Rybakina chuan a tumkhatna’na India leilunga a inkhelh tur chungchang sawichhuakin, “India rama tennis boruak hi ka lo hre ve chamchi tawh a, WTL behchhana he ram leilunga ka debut tur hi ka nghakhlel tawh a, ka phur takzet a ni. Ka team-te nen khelmual chhungah nuam ti taka hun kan hman ngei ka beisei,” a ti.
World Tennis League-ah hian team palite chu round-robin format hmangin an inkhel kual a, match tinah hian men’s singles, women’s singles leh doubles event pahnih zel a awm.
Round-robin khelh zawha point hmu sang team pahnihte’n final an khel zui ta thin a ni.
12-time doubles Grand Slam Champion leh WTL co-founder ni bawk Mahesh Bhupathi chuan India leh tennis chuan inzawmna thuk nak a neih thu sawi chungin India leilunga WTL nghah a ni ve ta chuan tennis leh India inzawmna a tinghet zual sauh dawn niin a sawi a; international champion rualkhat leh India top talent rualin khelmual thuhmun an luahho tur chu India naupang leh chhuan thar lo chhuak zel turte tan chona leh phurna thlentu, tennis inelna hrim hrim pawhin he rama hma a sawn phah awk awkna tur a nih thu a tarlang tel.