India leilungah Formula 1 kirleh dawn?!
Kum thum lai Indian F1 Grand Prix kan thlir hnuin promoter Jaypee Group lamin sum lamah harsatna lian tak an tawk a, kum 2014 atang khan Formula One calendar atangin nuaibo a ni a; tunhnaiah sports minister Mansukh Mandaviya chuan India leilunga F1 tlantir leh ngei a duh thu a sawi a, Indian fans an phu nghal dual!
India F1 Grand Prix hi kum 2011 atanga 2013 chhung khan season thum chhung Noida bula Buddh International Circuit-ah an han tlan ve lau lau a; host nih mana a thlengtuin kum khata an sum senral hi US dollar maktaduai 20 atanga 60 a kai hawlh a, hei vang hian chhiah (tax) chungchanga buaina an tawh piahlama sawrkar hnathawk liante atanga harsatna tawk zui ta, a hnua sum lama tlachhiaa puan (bankrupt) ni ta hial Jaypee Group tan India leilunga Formula 1 race huaihawt zui zel ngaihna a awm ta lo a ni.
Tunhnai khan sports ministry atanga thu thar awmah an minister Mandaviya chuan Greater Noida hmuna tlankawng (circuit) a tlawh a, circuit neitu Jaypee Group an bankrupt hnua Buddh International Circuit hmunhma leh bungrua enkawltu ni ta rih Yamuna Expressway Industrial Development Authority lam aiawh official-te pawh a titipui a, India F1 Grand Prix tihnun lehna tur kawng an dap mek tih hriat a ni!
India leilungah Formula 1 kirleh dawn?!
