INDIA MP ten Manipur sorkar dem na hle

May 3-a Manipur-a buaina chhuakah State sorkar chuan thla thum chhung pawhin thunun tuma a beihna kawngah a hlawhchham thak tih chu phat rual a ni lo, tiin Indian National Developmental, Inclusive Alliance (INDIA) atanga Parliamentarians 21 tena lehkhathawn Governor Anusuiya Uikey hnena an thehluhah tarlan a ni.
Heng INDIA MP te hi ni hnih chamin Manipur a thil awm dan hrefiah tura kal niin Churachandpur, Moirang leh Imphal a relief camp te pawh an tlawh a ni.
An hmun tlawhna atangin palai te chuan ‘Tharumthawhna avanga harsatna, thil chiang lo, rilru na leh lungngaihna mimal tena an tawhna te an ngaihthla a. Buaina chhuah tirh atangin lehlam lehlam ten thinrimna leh thlauhthlakna inngaihna nasa tak an lantir a ni’ tia sawiin hengte hi muangchang hauh lova buaipui nghal tur a ni, an ti bawk.
Community pahnih te an nunna leh property te humhim thei lovah Central leh State sorkar chu puhin. Tun hnai thla thum chhungin in leh lo chhuahsan mi 60,000 chuang an awm tawh, tiin palaite chuan an sawi bawk a.
“Silaia inbeihna mai bakah tun hnai lawkah pawh in inhalsakna te a thleng a, tun hnai thla thum chhungin buaina chinfelna kawngah State sorkar chu a hlawhchham thak a ni tih phat rual a ni lo,” tiin an tarlang bawk.
Palaite chuan relief camp-a chengte dinhmun a chhiat takzet thu sawiin a bik takin naupangte an lainatawm zual thu an tarlang bawk a. School te khar a nih reng avangin naupang te dinhmun a chiang lo hle ti bawkin Central leh State sorkar chu heng harsatnate hi a pawimawh dan azir zela chingfel turin an ngen bawk.
“Tun hnai thla thum chhunga internet hman theih loha siam chuan titi thangvel siamin chu chuan inrintawklohna a tizualkai nasa a ni,” tiin an ziak bawk.
Governor chu Union government hnena tun hnai ni 89 chhunga Manipur-a dan leh hrai lekkawhna hlawhchham dan hrilh turin an ngen bawk a. “Hon’ble Prime Minister ngawih rengna hian Manipur buainaa a ngaihdan danglamzia a pholang a ni,” tiin Parliamentarians te chuan an sawi bawk. Remna leh lungrualna a awm theih nan MP rualte chuan a hmasa berin rang takin ‘rehabilitation leh resettlement’ kalpui nghal a ngai an ti bawk a.
INDIA MP rual te hian July 30 khan Delhi let leh tawhin July 31 a Parliament Session a tel hman an tum a. Tunkar chhung hian Congress tena non-confidence motion an theh luh chu Lok Sabha-ah sawihona neih tan a nih rin a ni.