India-Myanmar ramri hung hna chak takin thawk
Thenawm ram atanga Rohingya lut ru tur leh ruihhlo tawlh tur danna atana India-Myanmar ramri hung hna chu chak taka thawh mek zel a ni.
India hian Myanmar nena inrina chhenchhe tak, km 1,643-a thui chu a hung hna a thawk mek a, km 401 vel a hung tawh.
Ramri hung hna hi ramri state – Manipur, Mizoram, leh Nagaland-ah kalpui tur niin heng state-te hi tun hma lam atanga ram hniha chengte an inkalpawh rengna hmun a ni a. Manipur-a ramri khaw pawimawh tak, Moreh-ah chuan km 9.2-a thui hung zawh tawh a ni.
Moreh-ah hian Covid-19 leng avanga ramri kâna inkalpawhna khar reng chu tunah hian dan pangngaia hawn leh vek tawh a ni a. Assam Rifles chu ramri kâna chet velnaa ven himna kengkawhtu ber an ni.
Tun hnaia India Today-in a kawmnaah Assam Rifles Director General Lieutenant General Vikas Lakhera-a chuan ramri ven hna hi a hautak tak zet tih a lo sawi tawh a. Hmun thenkhat chu ramngaw chhah tak a ni a, kawr ruam thuk leh chhengchhe tak tak a tam si a, uluk taka patrol reng a ngai niin a sawi a. Hung chu dan lova thil tihna vengtu tur a ni tih a sawi a, “Hnam khatte thenna tur hmanrua a ni lo,” tih a sawi.
Assam Rifles hi India-Myanmar ramri ven hna thawktu leh buaina awm thei vengtu an ni a. Thla ruk liam ta chhung khan hel 11 chuang thatin ruihhlo cheng vaibelchhe tel man an man tawh bawk.
Ramri hung rual hian sorkar laipui chuan tual chhung mite sumdawnna tur leh ram pahniha ramri hnaiha chengte an ei zawnna turin border haat siam hna pawh kalpui a ni a. Hung hna hi Border Roads Organisation (BRO)-in a thawk a ni.
Ramri hung hi pawl hrang hrangin an duh lo hlawm a, furah chet vel a tibuaithlak zual dawn niin an sawi.
India-Myanmar ram hian hmarchhaka state pali a paltlang a ni.
India-Myanmar ramri hung hna chak takin thawk
