INDIA party thukhawm te chuan Lok Sabha inthlan neih turah ‘a theihna chin chinah’ inthlan hmachhawnho an tum thu an sawi a. Resolution an siamah party hrang hrang inzawm khawmte chuan ‘India ram hmun hrang hranga public rally neih a, mipui harsatnate leh thil pawimawhte auchhuahpui ni se’ an ti bawk a.
Hei bakah hian ‘kan communication leh media strtategy te huang khata luantira Judega Bharat, Jiteega India’ theme hmanga media strategy leh campaign-te tawng hrang hranga kalpui ni se an ti bawk.
Seat-sharing a rang thei ang bera chinfel nghal tum a nih thu sawiin ‘inthleng tawn’ thupuia hmangin an kalpui tur thu a sawi bawk a. Septemebr 30 hmain seat-sharing chinfel hman ni se an ti bawk.
Congress president Mallikarjun Kharge chuan Indian national Developmental, Inclusive Alliance (INDIA) party te chu ‘thla lo kal turah beih inring’ sa turin a ti a, ‘indap thutna leh inman’ pawh awm thei a ni tiin a sawi.
INDIA alliance chuan len lam a pan zel laiin sorkarin a agency te a hmang sual nasa tial tial a ti bawk a. “Maharsahtra, Rajasthan, Bengal-ah te an ti tawh a. A nihna takah chuan Jharkhand leh Chhattisgarh-ah te pawh an ti tawh a ni,” tiin a sawi bawk.
INDIA bloc a hruaitu rual te chu fuihin Kharge chuan society section tinte chu BJP ‘authoritrian rorel dik loh’ tuartute vek an ni a ti bawk a. “140 crore Indians te hian an harsatna ata kan lakah beiseina an nei a ni,” tiin a sawi bawk.
Congress president chuan hate crime thleng hrang hrang te sawilanna nei bawkin chung zingah chuan tun hnaia Railway Protection Force personnel Rel a thah chungchang a sawi chhuak a. Thil mak a ni lo tia sawiin Kharge chuan mi pawngsualtute lung in atanga chhuahin hmun thenkhatah chawimawiin an awm a nia, sualna rapthlak fuihpawhrin hmeichhia saruakin an parade tir a ti bawk a. “Modi rorelna India-ah chuan Kargil a mihuaisen nupui pawh zuahin a awm lo,” tiin a sawi bawk a. Hei bakah hian sorkar chu beiin India federal structure tihniama State te thuneihna tihniamah a puh bawk.
“BJP hian agencies leh institutions tin te thunun vek a tum a ni. ED chief, CBI Director, Election Commissioners leh court judge te tak ngial pawh thunun a tum a nia” tiin Kharge chuan a sawi.
INDIA bloc tihchak chuan sorkar mek chu ‘hlauthawng’ in a siam a ti bawk a, hei vang hian, “awm ang lo tak takin kan MP te an suspend a, kan lakah privilege motions an kalpui a, kan mike te min tihtawpsak a, kan lungawilohna te camera-in an lak khapin Sansad TV a kan thusawi te an censor zui a ni,” tiin a sawi bawk.
NCP chief Sharad Pawar pawhin, “Meeting kan neih vang ringawt pawha sawiselin kan awm a. Tun hnai kum sawm chhungin, sorkar mek hian invaivung min ti zawk a nia,” tiin a sawi.
Congress leader Rahul Gandhi pawhin, “Vawiinah hmalakna pahnih lian deuh kan nei a. A pawimawh ber chu India mipui 60% ai kan awh hi a ni. He dawhkana thu party te hi kan lungrual a nih chuan BJP te tan inthlanah chak ngaihna a awm lo. A pawimawh hmasa ber chu coordination committee din a ni a, seat insem dan kan tichak ang,” tiin a sawi bawk.
INDIA party hrang hrang ten Mumbai-ah inhmukhawmna neiin hmalakna tur rel fel
