Larsap Dr Hari Babu Kambhampati chuan ama hmalaknaa Raj Bhavan-in a buatsaih lehkhabu, Mizoram mi leh sa, India sipai huaisen 56 chanchin tawi ziahna, “Bravehearts of Mizoram” tih chu Nilaini khan larsap hian a tlangzarh.
Ram tana nunna hlan sipai chhungte hnenah larsap hian lawmthu a sawi a. An hmangaih kalta te chu ram tana pasaltha, mihuaisen leh martar an ni, tiin, he lehkhabu hi martar chhungte hnenah a hlan a ni. Lehkhabu anga martarte hming leh nihna tawi siam chu kan martar-te chawimawina leh hriatrengna atana kan bat leh tih makmawh a ni tih a sawi.
He hunah hian martar chhungte pawhin thu an sawi a. Larsap hnenah hian an harsatna an thlen nghal bawk.
Mizoram atanga India sipaia tang zinga martar 56 hming hi National War Memorial New Delhi-ah tarlan a ni a. Mi pakhat hming leh nihna hi War Memorial bang cheina leirawhchan pakhatah zel ziah a ni.
Lehkhabu thuhmahruaiah Dr Hari Babu Kambhampati hian, “2023 February 20 khan New Delhi-a National War Memorial ka tlawh a. Hemi ni tak, February 20 hi Mizoram Statehood Day a ni lo ni leh zel a. Kan ram tana an nunna hlu tak hlantu, martar-te thlan han tlawh a, anmahni zahna chibai buk chu ka tan thil ropui tak a nih rualin, an thil tih ropui tak leh ram tana ka thil tih chhunte chu khaikhin chi rualah ka dah lo. An inpekna hlu tak avang hian zalenna, remna leh hmasawnna kan nei chho mek a. Kan ram chuan kan pasaltha huaisente hi zahna chibai a buk a, midang tana an nunna hlu tak hlantute chungah hian kan lawm kumkhua tawh ang,” tiin.
He lehkhabu hi Mizoram atanga India sipai tangte zingah martar-a chhiar, National War Memorial-a an hming tarlante bio data lakkhawm a ni tih larsap hian sawi bawkin, lehkhabu buatsaihna kawngah sipai hotute leh official-te, details leh data lakkhawm puitute hnenah lawmthu a sawi a. Department of Sainik Welfare & Resettlement Mizoram chungah lawmthu a sawi a ni.
“He lehkhabu hi kan ‘naktuk’ atana an ‘vawiin’ hlantu mihuaisente zahna lantirna atan buatsaih a ni. An inpekna hlutakte kha kan thinlungah a cham reng tawh ang,’ a ti bawk.
India tana nun hlantu Mizoram ami te chanchin ziahna lehkhabu in siam
