Indian boxing insingsa mek

World Olympic Boxing Qualifiers lama India a chetthat loh avangin India coaching staff siksawi a ni a, High Performance Director Bernard Dunne chu a hna atangin a bang a, foreign coach dang Dmitry Dmitruk pawh chhuak ve thuai tura ngaih a ni.
A hna atanga bang ta Dunne hi Irish professional boxer hlui niin, Italy lama a hna vawn lai a kalsan hnuin October 2022 khan HPD atan lakluh a ni a, a ho hian World Olympic Boxing Qualifiers hmasaberah India a chetha lo a; qualification event pahnih Asian Games leh World Olympic Boxing Qualifier khelh zawh hnuin India mipa boxer pakhat lek pawhin Paris Games an thleng zo lo.
Nimin, Zirtawpni khan Boxing Federation of India (BFI) ; he mi behbawma media a hmachhawnah BFI Secretary General Hemanta Kalita chuan Bernard kalbo thu puangin, Zirtawpni meeting-ah Indian boxing dinhmun kimchang an thlir tur thu leh ramdang coach an rawih mek dang Dmitry-a hmalam hun pawh an ngaihtuah tur zingah a tel tih a sawi.
Dmitruk hian nikum February thla, women’s World Championships hma lawk khan India ramah a hna a zawm a, kumin May thla hi Olympic atana qualifier hnuhnungber kalpui hun a nih tawh avangin men’s leh women’s team chetthatpui zo lo coach-te dinhmun siksawi tumna a kal chho ta a ni.
Federation lam chuan ramdang coach bana India coach-te ngei kuta men’s and women’s team enkawl mawhphurhna nghah a tum a, Kalita chuan foreign coach reng reng chhawr an tum tawh rih loh thu leh an hmunruak luah tura Indian coach an dapkhawm mek thu a sawi.
Tun dinhmunah Indian men’s coaching staff ni rei ber CA Kuttappa chu Indian men’s team-a Indian coach awmchhun niin, hmeichhe team lamah phei chuan nikum June thlaa Indian coach youth coach a nihna bansan Bhaskar Bhatt awm loh hnuah Indian coach an awm lo hrim hrim.
Tunhnaia Italy rama World Olympic Boxing Qualifiers hmasaberah khan Indian boxer pakua inlanin, hmeichhia pahnih leh mipa puruk fehchhuakte chuan medal lak an nei lo.
Barring Nishant Dev (71kg) chu vawikhat chak leh se Paris Olympic Games boxing inelnaa tling thei tur a nih laiin a tum ram a thleng zo lo a, Indian boxer dang zawng chu opening round-ah an tlawm fai vek!
An chak loh ngawt kha a lungchhiatthlak lai a la ni lo lehzel a, an tlawm dan kha first-round RSC leh knockout tihte a nih nawk avangin India federation tan enliam mai mai chi a ni lo.
Boxing-a India quota pali hmin tawhte chu women’s competition kaltlang vek la niin, two-time world champion Nikhat Zareen (50kg), Preeti Pawar (54kg), Parveen Hooda (57kg) leh Tokyo Olympics bronze-medallist Lovlina Borgohain (75kg)-te’n Paris panna ticket an hum fel tawh.
Indian boxer-te hian Olympic ticket beisei turin last chance an la nei a, chu chu May ni 23 atanga Bangkok khawpuia tan tur second World Olympic Boxing Qualifier hi a ni.
Chumi atana inbuatsaihna hun a tlem hle tawh chungin BFI chuan coaching staff a siksawi ta rum rum kal mek a, Dunne-a hnuaia selection kalphung lo zam tawh erawh zawh zel tum a ni.
Irishman bang ta khan selection trial aiin boxer-te theihna leh hmasawnna zirchian (evaluation process) kaltlanga ram aiawh tur thlan lam a awn tlat a, hruihrual chhunga inhnektir ngawt lo deuh tehna hrang hrang kaltlangin a thlangchhuak thin.
He kalphung hi boxer tam takin an sawisel a, men’s chief coach hlui Narender Rana telin coach dangte pawhin sap coach ngaihdan hi an tawmpui thei lo a, Rana phei chu a post atanga paihchhuah a ni zui ta nghe nghe.
Zirchian neuh neuh (assessment) kaltlanga Deepak Bhoria nekchhuah tak Amit Panghal (51kg) phei chu court-ah a kal hial a; Indian boxer zinga men’s World Championship silver-medallist ni thei awmchhun Panghal hian hruihrual chhunga inhnek hmanga ram aiawh tur thlanna (selection trial) hi kalpui ni se Bhoria hi a ngam mai thei a, mahse, Irish coach Bernard Dunne-a ruahmanna zulzui chuan Olympic qualifier takngial pawh a hmachhawn pha ve ta lo a ni.
Dunne-a hnuaiah khan non-Olympic weight division hrang hrang atana India camp chu Patiala atangin Pune lamah sawnchhuah a ni bawk.
Mipa chief coach hlui Rana chuan Dunne-a thiltih dan sawiselin, “Camp-ah a tlem thei ang ber hrual a duh a, Olympic weight category tinah mi pahnih bak India camp-a awm turin a duh lo,” a ti.
Hei hian India camp-a awmte tan inhnekfiampui tur (sparring partner) a tivang duak a, India camp-a awm ve duh tak tak boxer tha ber berte rilru pawh a tina hle niin a sawi.
India coach dang a hming tarlan loh pakhat pawhin sap coach thil kalpui dan chu Indian boxing tan a tha lo tih sawiin, “Indian boxing chakna bulpui hi boxer a neih tam leh khelh dan style hrang hrang awmin a hrinchhuah a ni ve bawk. Player style hrang hrang kawltu sparring partner duhkhawp awm lohna hian kan boxer tha ber berte a hliam a ni,” a ti.