Indian hockey team pahnih tum a sang

Indian hockey team pahnih tum a sang
Indian men’s and women’s hockey team-te chuan China ram khawpui pakhat Hangzhou-a Asian Games nghah turah gold medal an beisei a, nakum Paris Olympics-ah kawng thui zawk zawh ngai loa direct qualification an beisei nghal bawk.
Kum 41 zet an nghah hnuah India mipa team chuan Tokyo Games-ah khan Olympic medal hlawhchhuakin bronze an sualchhuak a; tunah hian August ni 3 atanga Chennai khawpuia khelh tan tur Asian Champions Trophy hmachhawn turin an inbuatsaih mek a; September-October thla chhunga Hang-zhou khuaa Asian Games lamah an inlan zui leh ang.
Tunhnai khan Indian men’s team captain Harmanpreet Singh chuan Hockey India hnenah an hmachhawp hrilhin, “2024 Paris Olympic Games khel tura kan beih mekna kawngah hmalam kan pan zel a, chumi atan chuan kan hmaah hian match pawimawh tak takin min hmuak mek a, chumi atana inbuatsaihna tour kan kalpui chhoh leh turah hian team tha zawk lakah inenchhinna kan kalpui thei dawn a, kan phur hle a ni,” a ti.
India hian Asian Champions Trophy-ah hockey team tha South Korea, Malaysia, Pakistan, Japan leh China tihte su thei turin hun remchang an nei mek.
Chumi chungchang chu Har-manpreet Singh hian tarlangin, “He’ng match kan khelh turte hi kan tan a pawimawh a, Hangzhou Asian Games inbuatsaihna atana tangkai tak tur an ni,” a ti.
Hockey India chuan chief coach Craig Fulton hnuaia training leh camp an kalpui chhoh meka mipa team-te rilru lam pui turin mental conditioning expert Paddy Upton an ruai bawk.
Hei bakah hian Netherlands atangin hockey goalkeeping coach hriat hlawh Dennis van de Pol an ruai bawk a, Asian Games gold medal leh direct-a nakum Olympic Games khelh phak an tumna kawnga Hockey India inbuatsaih dan hi a dik chho zela ngaih a ni.
Hmeichhe team lam pawh ngawrh takin an inbuatsaih kal ve mek bawk a, Germany rama match engngemawzat an khelh hnuah 100th Anniversary Spanish Hockey Federation-International Tournament khelin Spain lamah hun an hmang leh mek a, Ningani khan tournament kal laia an match hnihnaah si phur hmasa zet chungin mualneitu Spain lakah 2-2 dawr an hlawhchhuak.
India nulate hian nizan khan an game thumnaah England hmachhawn zui lehin, an result tarlan hman a ni lo.
FIH Hockey Pro League 2022-23 title kawltu Indian men’s hockey team pawh 100th Anni-versary Spanish Hockey Fe-deration – International Tour-nament-ah hian chhuak ve bawkin, Barcelona khawpuia an bultanna inkhelah 1-2-in mualneitu Spain an hneh lo zet a, Ningani vek khan an game hnihnaah 1-1-in Netherlands an inhnehtawkpui.
Indian women’s team captain Savita Punia chuan khelmual chhunga an theihtawp tak meuh an chhuah chhunzawm zel tur thu sawi chungin team chhunga player zawng zawngin Hangzhou Asian Games-a gold medal lak tumna rilru an put vek thu leh 2024 Paris Olympics hmachhawn tura direct qualification an beisei bawk thu a sawichhuak ve bawk.
Mizo nula Lalremsiami telna women’s team hian 3-4-a England hneh loin Tokyo Olympics-ah khan uiawm takin bronze medal an hlawhchhuak pha lo chiah chiah a nih kha.
Nikum Birmingham khaw Co-mmonwealth Games-ah erawh bronze medal awrhin, kum 2022 Nations Cup-ah an champion bawk.