Indian lawng dangin Middle East indona chhuahsan leh

Indian lawng dangin Middle East indona chhuahsan leh
UAE-a Fujairah lawngchawlhhmun beih a nih hnuah leh hna thawh thenkhat pawh rei vak lo chhung chawlhsan a nih hnuah Pathianni khan India flag tar tuialhthei thlitfim loh phur lawng chu him takin a chhuak niin thuneituten an sawi.
Sorkar chuan Murban crude oil ton 80,800 vel phurtu, Jag Laadki hi UAE-a Fujairah atangin chawhma dar 10:30-ah a chhuak a, India panin a kal mek tih a sawi.
Jag Laadki hi India flag intar lawng zinga indona hmun atanga eng tihbuaina mah tawk lova chhuak palina a ni.
Hetianga Indian tuialhthei thlitfim loh phur lawngin Strait of Hormuz-a paltlang hi Iran-in Indian lawng leh tuialhthei phurte him taka an kal theihna a tiam nia sawi a nih hnuah a ni a. Iran hian UAE lawngchawlh hmunte chu beih a tum nia a insawi avangin insawn chhuah a phut bawk.
Iran Foreign Minister Seyed Abbas Araghchi-a’n indona kal mek karah US leh Israel lawngte tan tuialhthei an lakna kawng pawimawh, Strait of Hormuz khar a nih tur thu a puan hnuah a ni.
Iran leh India hruaitute inbiaknaah chuan India flag tar lawng leh tuialhthei phurte tan him taka kal theihna tur siam a ni a. Jag Laadki bakah hian Indian flag intar LPG phur pahnih, Shivalik leh Nanda Devi chuan LPG ton 92,712 vel phurin Inrinnini khan Strait of Hormuz an paltlang tawh bawk.
Hemi hma hian Indian flag tar lawng dang, Oman-a Sohar lawngchawlh atanga Africa-a Tanzania pan tur gasoline phur chuan Zirtawpni khan him takin Strait of Hormuz a paltlang bawk a. Tunah hian Tanzania-a Tanga lam pan mekin Inrinni hian a thlen beisei a ni.
A hmaa chanchinbuten an lo tar lan tawh angin India flag tar sumdawng lawng 22, LPG phur paruk, LNG phur pakhat leh tuialhthei thlitfim loh phur pali chu Persian Gulf-ah an awm mek a, him taka kal an nghak mek niin thuneitute chuan Asia khawthlang dinhmun chungchanga thuthar lakhawmtute an kawmnaah an lo sawi tawh.
Shivalik leh Nanda Devi te hi karlehah Mundra leh Kandla lawngchawlh hmunah an thlen hman beisei a ni tih thuneitute chuan an sawi.
Iran hian kar kalta chhung khan Gulf ram hrang hranga lawngchawlh hmunte chu a bei nasa hle a, US chu UAE-a lawngchawlh hmun leh an hmunhmate Iran laka beihpui thlak nana hmangah a puh a ni.
Hetihlai hian US President Donald Trump-a UK, China, France, Japan, South Korea leh mi dangte chu Strait of Hormuz-a lawngte him taka an kal theih nan leh kawng pawimawh tak hi hawn reng a nih theihna turin an indo lawng tir turin a ngen.
“A nghawng tuartu China, France, Japan, South Korea, UK leh mi dangte hian he hmunah hian lawng an thawn ngei ka beisei a, chutiang chuan Hormuz Strait hi eng ram tan mah hlauhawm a ni tawh lo vang,” tiin Truth Social-ah a ziak.