Indian thlifimtuten Russian tuialhthei lei rih lo

Indian thlifimtuten Russian tuialhthei lei rih lo
Indian tuialhthei thlifimtute chuan April-a thleng turin Russian tuialhthei an lei lo va, rei tak an lei loh a rinawm niin hemi lama sumdawng leh thlitfimna lama hriate chuan an sawi a, hei hi New Delhi leh Washington inkara sumdawnna inremna siam theih chhan lian pawh niin an sawi.
US leh India hian Zirtawpni khan inremna ziak tura tihfel ngai tifel chhunzawmin March-ah chuan tihfel kim hman an tum a, hei hian Washington-in chhiah sang a lak a tihhniam dawn bawkah ram pahnihte eibar dapnaah a pui hle tura ngaih a ni.
Indian Oil, Bharat Petroleum leh Reliance Industries chuan March leh April-a thleng tura sumdawngten Russian tuialhthei an zawrh chu an hnar niin an sawi.
March thla bika thleng tur erawh heng thlifimtute hian an chah lawk sa nual tawh thung a, mi dang thlifimtute erawh chuan an chah tawh lo hrim hrim a ni.
Indian foreign ministry thupuangtu chuan khawvela mihring cheng tamna ber ramin energy an mamawh a chatlak lohna tur hian khawvel thil inher mek zel karah an tana tha tur ang zelin thil an kalpui tih a sawi.
US-India inremna turah hian Russian tuialhthei hi sawi lan a ni chiah lo va; mahse, President Donald Trump-a chuan India-in Russian tuialhthei a lei avangin Indian bungrua a lak luhah chhiah 25% a la laksak thin thung a ni.
New Delhi hian Russian tuialhthei a leisak thin a titawp dawn tih mumal takin a la sawi lo bawk.
India hi Russia-in kum 2022-a Ukraine a rûn hnuah Russian tuialhthei man tlawm leisak tam ber a ni a, khawthlang ramte chuan Moscow hian an tuialhthei hralhna hi indona atana an sum hnar berah ngaiin a leisaktute thlengin an hrem a ni.
India atanga Russian tuialhthei leisaktu tam ber pakhat chu Russia puihna nena mi mal thlifimtu, Nayara niin ni tin barrel 4,00,000 an thlitfim thin hi Russia atanga an lei vek a ni a. Anni hian July thlaa European Union (EU)-in a hremna avanga an leina thin dangte an tawmim vek avangin Russian tuialhthei hi an lei chhunzawm reng thung.
Hetih lai hian Nayara pawh hian April-ah chuan Russian ta hi an lei dawn lo nia sawi a ni a, anmahni tak erawh chuan engmah an la sawi lo.
Indian thlifimtute hian sorkarin ruahmanna a siam chuan Russian tuialhthei lei leh lei loh chungchangah hian thutlukna thar erawh la siam thei nia sawi a ni.
Trump-a chuan US thuneitute chu India-in Russia atangin a lei dan ngaihvena thlithlai zui reng turin a ti a, an lei chuan chhiah sang lak pawh kalpui leh mai turin a ti.
Thla hmasa atang khan India hian Russian tuialhthei a lei hi titlemin March-ah chuan ni tin barrel maktaduai khat a lei thin chu 5,00,000–6,00,000 velah tihhniam a tum a, nikum vel phei kha chuan ni tin barrel maktaduai 1.7 vel a lei thin a. Kum 2025 laihawlah phei chuan ni tin bareel maktaduai hnih a lei tling hial.