Indira thihchamah Rahul-a’n zahna hlan
Lok Sabha eptu pawl hruaitu leh Congress MP Rahul Gandhi chuan nimin khan prime minister hlui Indira Gandhi thlan, Shakti Sthal ah a thihcham pualin zahna a hlan.
Rahul Gandhi chuan social media platform pakhat X ah a pi Indira Gandhi video hlui pakhat post in, PM hlui leh a pi ni bawk Indira chu hnam inpumkhatna leh dikna duhtu niin, chu chuan a tichak reng dawn niin a sawi.
Rahul-a hian a pi chuan hnam inpumkhatna leh dikna bakah, vantlang rawngbawlna kawng engkim a fuih reng thu sawiin, a inpeknate chu amah tichak thintu, amah kaihruaitu an la nih reng thu a sawi bawk a ni.
Rahul Gandhi bakah hian Congress president Mallikarjun Kharge pawhin prime minister hlui Indira Gandhi thihchamah hian zahna a hlan bawk.
India ram prime minister hmasa ber Pandit Jawaharlal Nehru leh Kamala Nehru te fanu, Indira Gandhi hi November 19, 1917 ah a piang a, hmeichhe prime minister hmasa ber leh la awmchhun ni turin January 1966 atanga March 1977 thleng PM niin, January 1980 ah prime minister ni lehin, hemi a term hman zawh hma, October 31, 1984 khan amah vengtu Sikh pahnihin an kaphlum a ni.
Akbar Road-a a official chenna inah amah vengtu Sikh in an kahhlum hnu hian ramchhung hmun engemawzatah Sikh dodalna buaina a chhuak nasa zui hle nghe nghe.
Indira thihchamah Rahul-a’n zahna hlan
