Indo hnua a vawi khat nan Modi-a’n thuchah sawi

Indo hnua a vawi khat nan Modi-a’n thuchah sawi
Indian Prime Minister Narendra Modi chuan ni li chhung an thenawm, Pakistan nen an inbeih hnuah ‘firfiakte beihna’ a tawh reng reng chu na tak zelin a chhang let dawn tih a sawi.
“Tun hi indo hun a ni lo va, firfiakte hun pawh a ni chuang lo,” tiin Modi-a hian laipui leh vansanga indona nasa tak a awm hnua vantlang hmaa thuchah a sawi hmasak berah a sawi.
Indona hi Indian awp Kashmir-a mi firfiakten mi 26 an thah kal zela thleng niin India chuan Pakistan-a helho tihah a puh a. Islamabad chuan heng pawlte pui nia puihna chu a pha.
US-in palai hna thawkin nuclear nei inthenawm ramte hian kartawpah khan inkahhai an puang zui a. Lehlam lehlam hian an la inralring hle tih erawh an sawi ve ve.
“India hi mi firfiakin an bei leh a nih chuan chhanna na tak kan pe ang,” tiin Modi-a hian Thawhtanni zana thuchah a sawiah a sawi.
“Firfiakna leh sumdawnna thila inbiakna chu a kalkawp thei lo,” a ti a. Hei hi tun hnaia US President Donald Trump-a’n India leh Pakistan chu an indona an tihtawp hma chu a sorkar nen an sumdawn thei lo tih a chhannaa ngaih a ni.
“Tui leh thinsen a luang kawp thei lo,” a ti bawk a. Hei pawh hi India leh Pakistan ramten tui insemna tur inremna an neih, India-in a tihtawp a sawina nia ngaih a ni bawk.
Modi-a’n thuchah a sawi hma hian Pakistani Prime Minister Shehbaz Sharif chuan Inrinni khan an ram chu ‘a hmalatu’ an nih thu sawiin, “Kan zahawmna, kan dikna leh keimahni leh keimahni inzahna hi kan nunna ai pawhin hlu a ni,” a ti.
Tui chungchanga harsatna an neih chu muanawm taka indawr tawnin India nen an inrem thuai theih a beisei tih a sawi bawk.
Thawhtanni vek kha India leh Pakistan sipai hotu lawkte chu kartawp atanga an kalpui tan inkahhai kalpui dan tur kimchang sawiin an inkawm bawk.
Indian army chuan lehlam lehlam hian sipai chakna hmanga innawr chu tihtawp a tul hleah an ngai ve ve tih a puang.
“Lehlam lehlam hian ramri leh ral hmatawnga sipai dah titlem tura hmalak pawh tha an ti ve ve a ni,” tiin thu an chhuah.
India hian Ningani thlenga himna kaihhnawiha khar tura a tih tawh thlawhna tumhmun 32 chu civil mite tan a hawng leh tawh bawk.
Tun hnaia inepna boruak hi rei tak lo inmil lo tawh, India leh Pakistan inkara a nasa leh ber niin Himalaya tlangdunga Kashmir inchuhin vawi hnih an lo indo tawh a. He hmun hi an ta ve ve-ah chhal mah se tlem ve ve chauh an thunun thung.
Inepna boruak hian indona tak tak a hrin mai hlauhna a lian hman hle a; mahse, ni rei tak inbei lovin inkahhai a ni zui ta a ni.
Kar hmasaa ni li chhung an inkahah khan mi eng emaw zat thi an awm tih an puang ve ve.
Inrinnia inkahhai a puannaah Trump-a chuan ‘thihna leh thil chhia tam tak thlentu indona hi tihtawp vat a hun a ni’ tih a sawi.
India leh Pakistan hian sipai chakna hmanga inbeihnaah hian hnehtu zawkah an inchhal ve ve bawk.
Kar hmasa Nilaini khan India hian Pakistan leh Pakistan awp Kashmir-a hmun kua chu April 22-a khualzinte tlawh thin hmun mawi tak Pahalgam-a firfiakte chetna chhan let nan a kap.
Hemi hnuah hian India leh Pakistan hi ramriah laipuiin an inkap zui a, drone leh an thlawhna an inkah thlaksak nuam ve ve niin an insawi bawk.
Inkahna a nasat zel hnuah an sipai hmun ve ve pawh inkahsak niin an insawi.
Indian thuneitute chuan Pakistan Air Force hmun 11 an kap chhia niin an sawi a, heng zingah hian an khawpui, Islamabad bula Rawalpindi-a mi pawh a tel a. India hian Pakistan chuan Line of Control hrulah sipai 35-40 vel leh an thlawhna thenkhat an chân niin a sawi bawk.
Pakistan pawhin Indian kahnate chu an air force hmunah a tla nual tih a puang bawk.
India hian Pakistan leh Pakistan awp Kashmir-a mi firfiakte awmna hmun kua a kahnaah hian hel 100 chuang an thi niin a sawi bawk.
Pakistan sipaite pawhin India-a sipai hmun 26 chuang an bei a, an khawpui, Delhi chungah pawh drone an kap lut tih a sawi.
India pawhin Pakistani thil kah chhuahte chu an air force hmunah a tla nual tih a sawi a, Delhi-ah drone kah luh chungchang erawh engmah a sawi lo.
Pakistan hian Indian thlawhna panga a kap tla niin a insawi a, heng zinga pathum hi French Rafale niin a sawi a, India chuan engmah a sawi lo va, a zat pawh a sawi lo va. Hetih lai hian Pathianni khan inhloh chu ‘indonaa thil thleng pangngai’ a nih thu a sawi.
Pakistan chuan Indian pilot pakhat, a thlawhna tla atanga a inperh chhuak an kawl mek nia sawi chu a nih loh thu a sawi a. India pawhin ‘kan pilot-te him takin an lo kir’ tiin a sawi.