Indona-in a nghawng vil tur empowered group pasarih din

Indona-in a nghawng vil tur empowered group pasarih din
Indian sorkar chuan Iran indona avanga India economy, a bikin tuialhthei, boruakalhthei, leitha, bungraw inthawn kualna leh thil man sang ten nghawng a neih dan tur ngaihtuah turin thuneitu leh mi thiam awmna pawl (empowered group) pasarih a din.
Prime minister pisa leh cabinet secretariat-a thunitute telna empowered group-te hi Asia khawthlng buaina chhuak meka dinhmun danglam zel thlir leh India-a nghawng a neih tihnepna tura hmalaknate ena Cabinet Committee on Security (CCS) thutkhawm zawha Prime Minister Narendra Modi-a thupek anga din a ni.
Empowered committee pasarih zinga pakhatna chu thil pawimawh zual bik – ram venhimna, ram dang nena inkungkaihna leh mipui thununna huam a ni a, Foreign Secretary Vikram Misri chu convenor atana ruat niin Home Secretary Govind Mohan leh Defence Secretary Rajesh Kumar Singh te an tel bawk.
Department of Economic Affairs Secretary Anuradha Thakur chu eibar, sum leh bungraw inpekna kaihhnawih thil hrang hrang enfiah tura ruat panel convenor atan ruat a ni a, thil thawn chhuah leh lak luh lama harsatna awmte pawh an thlithlai tur zingah a tel.
Panel-ah hian Commerce Secretary Rajesh Agarwal, Financial Services Secretary M Nagaraju, Expenditure Secretary V Vualnam, Labour & Employment Secretary Vandana Gurnani, Heavy Industries Secretary Kamran Rizvi, Micro, Small & Medium Enterprises Secretary SCL Das leh Department for Promotion of Industry & Internal Trade-a secretary incharge Amardeep Singh Bhatia te an tel bawk.
Petroleum & Natural Gas Secretary Neeraj Mittal chu petroleum, LNG, LPG leh energy chungchanga secretary group thumna atan convenor a ni a, hetah hian power, lungalhthei leh mine ministry atanga secretary-te bakah ONGC, IOC leh GAIL hotute pawh an tel.
Lei tha leh lo neihna kaihhnawihin nghawng a neih dan enkawltu pawl pakhat chuan Fertilizers Secretary Rajat Kumar Mishra chu convenor atan an nei a, agriculture department leh lo neitu pawla secretary-te bakah Agricultural Research & Education-a secretary-te pawh an tel a. Leitha siamtu company-a CEO-te pawh panel-ah hian telh an ni a, thil thleng zela leitha sumdawnna dinhmun an ngaihvel tel dawn a ni.
Consumer Affairs Secretary Nidhi Khare-i chu thil man leh thil pawimawh chungchanga panel convenor a ni a, he panel-ah hian pharmaceuticals, health & family welfare, animal husbandry & dairying department leh agriculture & farmers’ welfare aiawhte pawh an tel.
Ports, Shipping & Waterways Secretary Vijay Kumar-a chu bungraw phurh leh kal dan thlithlaitu empowered group convenor atan ruat a ni a, he group-ah hian Civil Aviation Secretary Samir Kumar Sinha, Road Transport & Highways Secretary V Umashankar leh Railway Board chairman leh CEO Satish Kumar te an tel.
Information, communication leh vantlang lo dawr tura ngaihtuah tur panel pasarihna chu Information & Broadcasting Secretary Sanjay Jaju-a’n a ho dawn a, tuialhthei leh natural gas, leitha, thil thawn leh consumer affairs leh external affairs ministry-a hotu lawkte pawh an te.
Empowered group-te hmalakna tur zau takah hian energy inpekna leh thil man bithliaha hlauhawm awm theite vil, bungraw phurhna tihbuaina awm thei ven te pawh a tel a. Ram chhunga thil awm dan en fiah leh thil pawimawh man a chet leh chet loh pawh an en fiah tur zingah a tel.