Indonesia-a North Sulawesi-ah nasa taka tui lian vangin mi 14 vel thi an awm tawh a, chin hriat loh eng emaw zat zawn hna thawh mek zel a ni bawk tih thuneituin a sawi.
Siau Tagulandang Biaro region-a Siau-ah Thawhtanni zing atanga ruah sur avangin tui hi a lian tih tual chhunga chhanchhuah hna thawktu pawl thupuangtu, Nuriadin Gumeleng-a chuan a sawi.
Thawhlehni khan chin hriat loh mi pali zawng turin mi 16 an thawk chhuak leh tih a sawi a, mi 18-in hliam an tuar bawk niin a sawi.
Thawhlehniah pawh khan kawngpui lian tam tak chu lung, lei tla leh chirhin a la hnawh a. Mi 444 sawn chhuahte chu biak in leh sikulah dah an ni tih disaster mitigation agency thupuangtu, Abdul Muhari chuan a sawi bawk.
Tui lian hian in leh sorkar hmun tam tak a tichhia niin North Sulawesi Governor Yulius Selvanus-a’n a sawi.
Indonesia-ah hian Java, Sulawesi, Maluku leh Papua thliarkarte chuan January leh February-ah hian fur a nat lai ber an tawng thin a, tui lian nasa zawk pawh a la thlen a la hlauhawm hle tih weather agency chuan an sawi.
Sumatra leh Borneo-ah chuan fur vanglai hi November leh December a ni ve thung.
November thla khan cyclone-in a thlen tui lian leh lei min avangin Sumatra-ah mi 1,000 chuang an thi a, tam tak chin an la hre lo bawk.
Indonesia tui lianah mi 14 vel thi tawh
