Commerce & Industries minister F Rodingliana chuan Ningani khan Export Promotion Industrial Park (EPIP) Lengte tlawhin industrial unit hrang hrang awmze nei zawka industry azira a hlawma dahkhawm /plot dan tur a enpui.
EPIP Lengte re-plotting hna hi Commerce & Industries department leh Mizoram PWD chief architech-in buaipui mekin, industry thuhmun ho cluster khata dahkhawm tur a ni. EPIP chhunga inkalpawhna (internal road) mumal zawka duan bakah power supply line mumal zawka zam dan tur ruahmannaah hian telh a ni.
EPIP chhunga industry-te tan dedicated powerline siam dan tur Power minister ni bawk F Rodingliana ho hian en a ni a. Ruahman ang chuan, Sihhmui Sub-Station atanga 11 kV line hmanga industrial unit chawm tur liau liau line kal tir tum a ni. Hei hi tihpuitlin a nih chuan industry-te tan power supply tha leh regular zawk a pek theih dawn tih sawi a ni.
Domestic consumer line dangte nen an la thlun pawlh avangin line dang siamthat dawna industrial area-a shut down lak ngai thin chu pumpelh a ni anga, industry-ten regular zawkin khawl an hmang thei dawn tih a sawi a ni.
Industries minister hian industry inangte hmun khata a hlawma dahkhawm a nih chuan, industry ek chhia (waste product) pawh awmze neia hman tangkai theih a ni anga, raw materials a bo a bang awm loin thil tangkai siamchhuahna atan hman vek theih a beisei tih a sawi a ni.
Minister hian EPIP Lengte chhunga hmasawnna hnathawh mek bakah industrial unit-te water supply mumal zawka pek dan tur a enpui nghal a. Industrial Estate Luangmuala hmasawnna hnathawh mek a en bawk.