Inenchhin hun hi a rei dawn lo – MNF sr vice president

Enchhin sawrkar chu mipuiin an chik dawn a, inenchhin hun a rei dawn lo tih MNF senior vice president Tawnluia chuan a sawi
Zirtawpnia MNF office Mizo Hnam Run inkhawmah Tawnluia chuan tun inthlan result chu an thatna tur zawka Pathian remruat a ni tih an pawm a. ZPM an lawmpui a, duhsakna an hlan tih a sawi. MNF MLA 10-te chu constructive opposition an ni dawn tih sawiin, “Enchhin sawrkar hi mipuiin kan chik dawn a, kan thlir uluk hle ang. Kan inenchhin hun hi a rei dawn lo,” a ti.
Kum 1963-ah political party chak ber an lo ni daih tawh a, an theihna niloin Pathian hruaina avangin sawrkarna an siam fo tawh tih sawiin, “Kan lung a chhia a, kan mittui a tla thin a, kan lawm a, kan hlim fo tawh thin. Tunah pawh kan thinrim lo a, kan lungawi lo hek lo. Hmana min pek ang sawrkarna Lalpan min pe leh mai dawn. Pathianin min lo hruai tawhna zawng zawngah lawmthu kan sawi a ni. Inthlana buai zawng zawng, vote thlaktu zawng zawng chungah lawmthu kan sawi a ni,” MNF hruaitu hian a ti.
An chaklohna chuan thahrui thar a pe dawn a. Unit level atanga general headquarters thlengin an insiamtha dawn a. An nguai reng dawn lo tih MNF senior vice president hian a sawi a. An vote hmuh pawh a tlemlo a, an tho leh thuai dawn tih a sawi. “MNF pianna chu Mizo nationalism a ni a, kan auhla ber tur a ni reng ang. Tawngtaina nen kan bei zel dawn,” a ti.
MNF sawrkar hna thawk lo anga an puh chungchangah a taka hretu chu mipui an ni tih a sawi a. Covid-in an hnathawh a tibahlah hle a. Hmasawnna hna an tum anga an thawh theih loh rualin, engmah thawk lo anga an puh duh tlat chu a dik bik lo tih a sawi. Hmathar la in, hnathawk peih, mi taima leh rinawm thahnem tak an la awm a. An tho chhuak leh dawn tih a sawi a ni.