Infiammi leh official 259 hnenah sawrkarin incentive award a hlan

Infiammi leh official 259 hnenah
sawrkarin incentive award a hlan
Sports discipline 15-a international leh national level-a medal la pha chin infiammi 218 leh official 41 hnenag Mizoram sawrkar chuan Nilaini khan Incentives Cash Award a hlan a, a vaiin Rs. 94,19,925 a ni.
Hmanpuitu Sports &Youths Services minister Lalnghinglova Hmar chuan, kum 4/5 kaltaa National Games-a Mizoram dinhmun en chuan 27-na, 28-na tih vel kan ni a. Kan dinhmun dik tak kan hriata kan tan zual a ngai tih a sawi.
State angin, national level-ah kan sang lo hle tih kan pawm ngam a ngai tih sawiin, “Sports kan tui a, infrastructure leh thil dangah sum pawh kan seng nasa ve tawh. Human resource development lamah tan kan la tawk lo nge ni ang, Mizoram hian Olympic medalist pahnih chauh kan la nei thei a. India-in 2036-ah Olympic thlen a tum a, chutah medal lak ve pawh kan la dream tha ngam loa, engtin nge kan tel ve theih hram ang kan la ti lauh lauh chauh a ni,” a ti.
Tih dan pangngaia kan kal reng chuan eng kan ang loang, tiin, “Eng sports discipline hian nge National Games, Commonwealth Games, Asian Games leh Olympic-ah min hnuk hnai thei ang, tia awmze nei taka kal turin kan inruahman a. Empowering Mizoram Sports hnuaiah discipline 8 tan trainers’ training kalpui tan a ni,” minister hian a ti.
Category dang thlauhthla lo leh Mizoram State Sports Council hnuaia promotional fund khawih buai si loin, discipline duat bik leh insawrhbingna discipline neih a tul a. Kum 8-15 inkar infiammi, talent nei tha bik chu EMS hmalakna hnuaiah National Games, Commonwealth Games, Asian Games leh Olympic thlir ranin hrual an ni tawh dawn tih a sawi a ni.
Mizoram Sports Incentive Cash Award Scheme 2025 hi kumin February khan notified a ni a. Kumina dawng tur thlanna atan hian scheme hlui (2022) leh a thar (2025) hmang kawpin, infiammite tana a hlawk thei tur lai lai hman a ni.
He scheme hnuaiah hian medal latu player-te chauh ni loin, inelna hmuna anmahni hruaitu (manager, coach leh contingent leader) hnenah Incentive Cash Award hi pek ve theih a ni a. An player hruaite award dawn theih zat atanga chhuta 30% chu coach hnenah pek niin, 25% chu Team official-te hnenah pek a ni.
Hei vang hian tun tumah hian infiammite tan award 224 leh Team official-te tan award 41, a vaiin award 265 sem a ni a. Chutihrualin lawmman pakhat aia tam la an awm avangin lawmman dawngtu hi mi 218 (mipa150, hmeichhia 68) an ni thung. Infiammite award dawn tamna discipline chu: football-ah 35, badminton 4, Muaythai 30, Taekwando 29 niin, Boxing leh Judo atangin 1 ve ve an ni.