Infiammi tithate hnenah sumfai sem
Khawvel huap leh India ram pum huapa infiamna lama hmingthate chawimawina sumfai (Incentive Cash Awards) chu Nilaini khan Aizawlah sem a ni.
Hmanpuitu Sports & Youth Services minister Lalnghinglova Hmar chuan Mizoram sawrkar chuan infiammite banah a kai dawn a. A bultanna atana ‘Bana Kaih Scheme’ hnuaiah Mizoram pum huapa sports coaching leh talent identification kalpuina’n cheng vaibelchhe 2.5 pawm a ni tawh tih a sawi.
Sawrkarin Incentive Cash Award Scheme a ennawn mek tih sawiin, Olympic discipline ni lo pawh tel tura ruahmanna siam a ni tih minister hian a sawi a ni.
Lawmpuina sumfai hi 2023 April 1 atanga 2024 March 31 chhunga national leh international-a infiammi lawmman (medal) dawngte hnenah sem a ni a. Incentive Cash Award hi Incentive Cash Award Scheme 2022 tlawhchhana siam niin, hemi hnuaiah hian medal latu player-te enkawl a, inelna an neih hmuna hruaitu official-te hnenah player-te sum dawn zat atanga chhuta zaa 25 pek an ni.
Tun tuma Incentive Cash Award hi a vaiin Rs. 1,10,92,000 a ni a; infiammi 416 hnena sem a ni. Heng infiammite zinga 276 chu mipa niin, hmeichhia 131 an awm a, contingent official 9 an awm bawk.
Chawimawina sumfai hi discipline hrang hrang 15 – badminton, basketball, belt wrestling, boxing, football, hockey, tennis, sepaktakraw, shooting, table tennis, taekwondo, volleyball, weightlifting, wrestling leh wushu-a gold, silver leh bronze medal latu an ni.
Tun tum Incentive Cash Award semnaah hian Lalremsiami (hockey), Jeremy Lalrinnunga (weightlifting), Lalruatfela (weightlifting) leh Cindy Lalruatpuii Colney (football) hi international level-a lawmman la thei an ni a. Mimal anga sumfai la hnem ber chu Hockey player Lalremsiami a ni a, a ni hian Indian Women Hockey Team-a tela a lawmman dawnte avangin Rs. 1,45,000 a dawng.
Infiammi tithate hnenah sumfai sem
