Infiamna hmangin NE mi enhranna
tih reh mek a ni – Robert Romawia
India ram hmundanga chengten hmarchhak mite an enhran thinna chu infiamnaa an hlawhtlinnna avangin a reh mek tih Sports minister Robert Romawia Royte chuan a sawi.
Thawhtannia National Sports Conclave New Delhi-a neihah Mizoram Sports & Youth Services minister hi North East sports chungchanga speaker zinga ruat a nih angin thu a sawi. NE states leh mipui chu India ram hmun dang atanga danglam, a ramri zaa 99 chu foreign ram nena inri a ni tih a sawi a. NE mipui chu India mipui atanga chhutin zaa 3.3 chauh an nih laiin, football bikah I-League player zaa 40 chu NE player, ISL player zinga zaa 30 chu NE player an ni tih a sawi.
“NE mipuiin India ram atanga hrang deuha an inhriatna leh India ram lailiten NE state-te an hmuh hran deuhna chu sports vangin a reh a, inpawhna tha tak a awm tawh a ni,” a ti.
NE state-ten talent nei tha mah se, infrastructure a la nei tha lo hle tih Robert Romawia hian a sawi a. Talent hmuhchhuah loh a tam a rin thu a sawi.
Mizoram sawrkarin sports hmasawnna atana hma a lak dan sawiin, sports chu industry nihna pek a nih thute, Fit India Movement tan hmain Fit Mizoram Movement tan a nih dan te a sawi a. India-in boxing-ah medal tam zawk a lak theihna’n professional boxer-te Olympics, Asian Games adt ah tel tir ve thin tha a tih thu a sawi bawk. Sawrkar laipui piahlamah private company-te Mizoram sports atana thawhpuiah a sawm a ni.
National Sports Conclave-ah hian Union Minister for Youth Affairs & Sports Anurag Thakur, chu khuallian niin, MP/MLA leh mipui aiawha thlanchhuahten an bial zelah sports competition huaihawt se a duh tih a sawi a. Mitinte chu sports hmasawnnan tan la turin a sawm.
Conclave hi Sportstar, The Hindu Group-in an huaihawt niin, Union secretary te, infiammi langsar te, sports writer-te an tel a ni.
Infiamna hmangin NE mi enhranna tih reh mek a ni – Robert Romawia
