Mizoram Football Association leh Women and Child Development department tangdun chuan Ningani khan Aizawlah ‘State Level Workshop on Sports and Gender – Challenges and Way Forward’ an buatsaih.
Hmanpuitu Sports & Youth Services minister Lalnghinglova Hmar chuan United Nations Sustainable Development Goal 5-na chu gender equality (mipa leh hmeichhe intluktlanna) a ni tih sawiin, sawrkarin hmeichhe hamthatna a ngaipawimawh tih a sawi. Kum 2024- 2025 budget-ah pawh gender budgeting a tel tih a sawi.
Mizo hmeichhe infiammite tana hmanrua leh hmunhma a that tawk loh thu leh sawrkarin a theih ang anga tihhmasawn a tum thu sawiin, MFA pawhin hmeichhe tana football league leh inelna dang tam thei ang ber buatsaih a tum tih a sawi a. Mizo hmeichhe tamzawkin eizawnna atana sports an hman theih nan tuna khel mekte chu sulsutu ni turin a fuih.
Workshop-ah hian MFA chuan India International football player Grace H Lalrampari, Cindy Remruatpuii Colney, C Ramthanpuii, Lalduhawmi, B Lalhriattiri, Offee Lalhmingchhuanpuii leh Gladys Zonunsangi te bakah national referee pathum, level 5 ni phak – F Zohmingliani, Lalhruaizeli Khiangte leh Lalthansangi, Mizo hmeichhe zinga AFC ‘C’ coaching license nei awmchhun R Lalnunsangi te hnenah chawimawina a hlan a ni.
Women & Child Development director Zoramthangi Chhangte sawi danin, department zirchianna atangin Mizorama infiammite zingah hmeichhia an la beitham hle a. Football-ah hmeichhiate hmasawnna atan MFA nen thawhdun zel an inhuam.
Infiamna lama hmeichhe tan kawng tha zawk siam sawiho
