Inhnuhdawh chungchangah captain Kane a lawm lo

Tarlan tawh angin, interim manager Lee Carsley hnuaia England match hnuhnung pahnih khel tur squad thlan fel diam tawh atangin player pakua tehreng an inhnukdawk a, hei hian ram tana game 101 khel tling tawh England captain Harry Kane a tilawm lo a, England chu club hmaa dah tur a nih thu hial a sawichhuak.
Kumin January thla herchhuah rualin head coach thar atana inremna ziahpui tawh Thomas Tuchel chuan Three Lions a kaihruai tan dawn a, chu mi hmaa team lo enkawl lailawktu Carsley hnuaiah England hian match hnih khelh hmabak an la nei a, mahse, a maka maka tam player an inhnukdawk a; thenkhat hi chu hliam vangte a nih rualin a then hi chu a chhan puanzar lohte a ni hlawm a, coach nghet lo kohna tlanchhiatsan chu an pawisa vak lo emaw tih tur a ni!
Kane a rawn tawngchhuak ta chat a, ITV Sport hnenah, “Ka ngaihdan chuan thil dang zawng aiin England hi kan dah hmasa tur a ni.
“Professional footballer i nihna zawna pawimawh ber tur chu England a ni a, hetih kawngah hian Gareth (Southgate) kha a khauh khawp thin mai a, ram tana inkhelh dahpawimawh hmasalote chunga thutlukna siam kawngah hlauh a nei lo.
“Season hautak lai pawh a ni ang, mahse, England aia pawimawh tur hi awm turah ka dah lo a, engmahin a hmakhalh lo turah ka ngai hlawm tawp,” a ti.
Chhuak hmasa lama tarlan tawh ang khan Trent Alexander-Arnold, Cole Palmer, Phil Foden, Jack Grealish, Bukayo Saka, Declan Rice, Aaron Ramsdale leh Levi Colwill-te chu squad atangin an inpuchhuak phawt a, a hnuah inhnukdawkte thlak tura sengluh zinga mi Everton player Jarrad Branthwaite a kalbo ve leh a, player pakua ngawt an chhuak ta a ni!
Tunhnai ni hnih chhunga team ruala training kalpui Liverpool player Jarell Quansah chu Branthwaite hmunruak luah tura ngai a ni.
Kum thar atanga a hna vawn lai chawlhsan tawh mai tur Carsley ngaihdan erawh a hahdamthlak phian a, history en pawhin November thla hi chuan chona a nasa a, kum dangah pawh kan heti duh reng reng a; inhnukdawk an tam leh ram tana la khel ngai lo leh khel khat zawkte tan hun remchang a inhawng tihna a ni mai,” ati sam et!
England hian an regular first team heti zat tel lo chung pawhin nizan result tarlan hman lohah Greece chu an khawpui Athens-ah pawh ni raw sek sek an hneh ngei tura ngaih niin, Pathianni zan hian Uefa Nations League kal mekah Pathianni zan hian Wembley-ah Republic of Ireland an hmachhawn zui leh ang.
Kane-a’n hliam vang pawh ni loa player inhnukdawk chiam tha a tih loh chungchang a sawi hi a squad khawrpum chhungah sawirik zui a ni lo tih Carsley chuan tarlang telin, club-versus-country inhruipawhna pawh a awm zui lem lo tih a tarlang tel.
“Amah, Harry Kane-a ngaihdan a ni mai a, kei chuan ka hmaa awm mekte chungchang bak buaipui theih ka nei lo.
“Season vanglai, player-te rimtawng lai a ni a, under-21 leh under-20 lamin hun remchang an hmuh phah ve thung a; player-te hian he hmuna awm hi an inchhuanpui a, an hmalam atana phurna leh thathona petu a ni,” a ti then!
England player-te inhnuhdawh thup chhan kha thlir zui leh lawk ila.
Inrinnia sihnih faia Liverpool-in Aston Villa an hneh tum khan full-back Alexander-Arnold chu first half-ah hliam avanga lakchhuah niin, midfielder Rice kha Pathianni London derby-a Arsenal leh Chelsea 1-1-a an inhnehtawk tum khan ke zungtang tliak chungin a khel a, minute 71 thleng a daih.
Saka pawh bultantu zingah khan tel bawk mah se hun tawp dawnah a baichhuak a; last international break hnuhnung berah khan England tana a khelh laiin a inhliam a, Arsenal game hnih a khel lo.
Chelsea player Palmer chu a lut lo mai ang tih a nih laiin khelmualah kan hmu a, ram tan chuan a chechhuak zui thei dawn ta lo a ni.
Inrinnia Wolves laka sihnih faia Southampton tlawm tum khan goalkeeper Ramsdale chuan a kutzungtang a tiauh niin a lang a, hei hi England squad atanga a chhuah leh chhan niin a lang.
Manchester City match hnuhnung pasarih ngawt mai khel thei tawh lo mah se forward Grealish chu England squad-ah a kirleh a, Pep Guardiola pawhin Lee Carsley thutlukna a sawisel phah nghe nghe a, mahse, Grealish pawh hi ram tana a chetchhuah tak tak hmain a inpuchhuak zui leh ta tho a ni.
West Ham leh Everton insut tuma hliam tenau tuar Branthwaite pawh club lamah a tawmbo mek.
Hetih lai hian karliamta tawpa minute 90 chhung khel tluan thei pahnih Chelsea defender Colwill leh Manchester City midfielder Foden-te ram tana an remchan loh chhan erawh hriat theih a ni lo.