Inkahhai rawtna tharah Hamas-in mi hren chhuah tum

Inkahhai rawtna tharah Hamas-in mi hren chhuah tum
Inrinnia indawrna thar kalpui a nih hnuah Gaza-a inkahhai kalpui thar a nih theih nan Hamas chuan an mi hren chhuah belh leh an rawt a. Indawrna hi Israel sipaiten Gaza Strip-a na zawka beihpui an thlak tan hnu lawka neih a ni.
Hamas hian ni 60 inkahhai an rawtnaah an mi hren mi pakua chhuah leh Israel-in Palestinian an man chhuah an pawm niin Palestinian thuneituin BBC a hrilh.
Rawtna tharah hian ni tin puihna phur truck 400 luh leh Gaza-a damlote lak chhuak a tel bawk a. Israel hian mi hrente an la dam tih fiahna leh an chinchang kimkang hriat a phut leh ve bawk.
Inbiakna hi Qatari leh US palaite kaltlangin Doha-ah neih niin Inrinni chawhnuah khan an tan a ni.
Israel hian vantlang hriatah Hamas rawtna thar chungchang hi engmah an la sawi lo va; mahse, Gaza-a an sipaite lak chhuak emaw, indo tihtawp nghal vut emaw chu an pawm loh hmel a ni.
Hetih lai hian rawtnaah hian hetiang hi telh a ni lem lo nia hriat a ni bawk.
Israel-a sipaite hian rei tak indona a kal tawh chungin Inrinni chawhma atang khan ‘Operation Gideon’s Chariots’ tia hming vuahin Gaza hi thapuiin a bei thar leh mek bawk.
Ningani atang khan mi 300 chuang thi an awm leh tawh niin chhan chhuah hna thawktuten an sawi a, heng zingah hian hmar leh chhim lama damdawi in leh refugee camp beihnaa thite pawh an tel.
Thla hnih inkahhai an puan a zawh hnua pawt sei tura inremna an neih theih loh hnuah Israel hian March 18 atang khan Gaza bei thar lhin mi sang tel an thi leh tawh.
Israel hian Gaza luhna chawlhkar 10 a dan tawh avangin tanpuitu pawlte chuan Gaza-a chengte dinhmun chu a chhe tak zet tawh tih an sawi bawk.
Israeli Prime Minister Benjamin Netanyahu-a chuan thla tirah khan sipai chakna hmanga na zawka an beih tur thu leh Gaza an thunun dawn thu a puang a, Palestinian te chu chhim lamah dah khawmin Hamas an ‘tichhe dawn’ tih a puang.
Tanpuitu pawlte chuan Gaza-a mi maktaduai 2.1 chengte chu tam thei dinhmunah an ding tak meuh tih an sawi a, Israel-in thil lak luhna a dan avangin naupang tam tak chu kham ei tur neih loh vangin chhe takin an awm mek tih pawh video leh thlalakah a lang.
US President Donald Trump-a pawhin Zirtawpni khan ‘mi tam tak riltamin an awm’ tih a sawi a. Israeli sorkar erawh chuan Gaza-ah hian ei tur a awm reng niin a sawi ve thung.
Israel hian October 7, 2023-a Hamas-in an ram beia mi 1,200 chuang an thah leh hren tura mi 251 an hruai phuba lak nan an awmna, Gaza hi a bei a. Hamas hian mi 58 an la hreng.
Indona a chhuah hnuah mi 53,000 vel an thi tawh niin Hamas hnuaia health ministry chuan a sawi a, heng zinga 3,000 chuang hi March thla hnua mi an ni.